قیرمیزی داغ
قیرمیزی داغ
زیل قارا…، زیل قارانلیق ایچینده قیرمیزی داغلار یوخودو. یئل اووولداییب قارانلیغین ایچیندن اسیردی. ار – آرواد یئل ایله گوله‌شه گوله‌شه یئریییردیلر. آروادین سؤزون یئل گؤتوروب تولایا – تولایا آپاریردی. کیشی سؤزلری قیرین قیرتی ائشیدیردی؛ … ائشیتمیردی. یاشا دولموش بیر کیشی. هاوا سویوق ده‌ییردی. یئل بیرآز اوشودوردو.
– کیشی نین جیبیندن پول چیخمیر… آخی پیاده گئدیسن؟! باری شهر ایچی نن گئت… اوتوبان دا اولدو یول؟! ماشین گلدی چیرپدی نئینیه‌جه‌ییک؟ کیم نه بیلیر هارداییق؟!
آرواد دایاندی الیله دؤیره‌بری گؤرستدی. کیشی بیر آتدیم سونرا دایاندی. اؤنجه آروادا باخدی سونرا گؤرستدیگی یئرلره… هئشزاد یوخودو… قارانلیق. ماشینلار سووشدوقجا بیر سس بیرده ایشیق سالیردیلار. سس قاریشیردی اووولتویا، ار- آروادین اوره‌یینه هؤل سالیب قاباقلاردا یوخ اولوردو. ایشیق؛ سول یاندا دیب – دیبه توخونموش ائولری، ساغ یاندا، باخان اولسایدی… هئچ نه… بیر آنلیق داغین آیاغین گؤرسه‌دیردی.
« قیرمیزی توپراق، گئجه‌نین قاراسیندا ایتیر»
دئدی: – خارابانین چیراقلاری دا یانمیر باری!
– نه چیراغی آخی؟… آدام، آدام یولویلا گئدر…
تزه‌دن یولا دوشدولر. کیشی بیر جور اولدو. ائله‌بیل او سؤزو دئین بونون آغزی ده‌ییردی. باخیردی قاباغا، قارانلیقدان هئچ گیلئیلی ده‌ییردی. قاباق‌دا اؤزو ایله آروادین گؤروردو: قیراق توپراق دان چیخدیلار آسفالتین اوسته جاده‌یه. آروادین گؤیلو یوخودو. بیر سؤزلر دئدی. قاباقدان بیر ماشین گلیردی؛ تیرئلی یا پئیکان، فرق ائلمز. یاپیشدی آروادین چییینیندن، بیرده بؤیروندن. آرواد باخدی اوزونه. کیشی باخمادی، باخانمادی. ایته‌له‌دی. تیرئلی یا پئیکان، چیراغی توشدو گؤزونه. آروادین اوزو کیشی‌ده‌یدی. شوفئر آیاغین باسدی تورموزا؛ ته‌یر سوروتلنمه سسی گلدی. سیقنال سسی گورولدادی سوکوتدا. گئتدی داغلارا ده‌یدی قایتیدی. چیغیرتی سسی، چیرپینتی سسی، اوزولمک، شوشه‌نین اوغولماسی… ماشینین دایانماسی، شوفئرین ایکی اللی باشینا چالماسی…
قورودو قالدی… نئینییه‌جئیدی؟!… بؤیوک قایا… آرخاسیندا گیزلنمک… آرادان چیخماق… آمما ترپننمیردی. آرواد دئدی:
– نیه دوردون!؟!
باشین سیلکه‌له‌دی:
– هئشزاد.
توپراق یاش ایدی “راضیه”نین باشماقلاری آغیرلادی…
کیشی یئریمه‌یین باشارمیر. گئدر توالته آیاق اوسته ایشر داشلاندیرار دوز بوراجان. ائشیکدن گلر شالوارینین دالی سی، گؤتونون اوستونه‌جن زیغ. سونرادا راضیه! ها یو ها آریت.
دایاندی باشماغینین زیغین آریتماغا:
– اح… اوستو باشیمیز دا تئ زیغ اولدو!
“جاببار” دایاندی قیچلارینا باخدی. دیزه‌جن باتمیشیدی. آیاغین زیغ‌‌دان قوپارتدی چیخدی آسفالتین اوستونه. آرواد دئدی:
– سنی نه دئیم اولاسان آخی جاببار. اول آخیر سندن دوز ایش…
– پوخ دوز ایش گؤرنلرین ده آغزینا، اوبیرسی نین ده.
آرواد بیر دوروخدو. داهی دینمه‌دی؛
« ائله اول‌دن بئله‌دیر بو!»:
– یاخجی ائ… ناوار گئنه سنین الیوه بئش قیران پول گلدی شوموره ) شمر( دؤندون؟!
الین بیر جور توتدو جاببارا ساری. چؤندو اوزاقلاشدی. چؤننده کئش ایله باغلادیغی توکلری کوره‌یینیده اوینادی.
– شومور قارداشلاریندیر آنلاماز!
نه قدر گؤیلو ایسته‌دی یاپیشسین توکلریندن بئش – آلتی‌سین چکسین اوزونه.
– شومور سنسن! دئییرم پول وئر یئتیملریوه پالتار آلیم. قاباق قیش‌دیر. خشلیییب قوتاراجاقسان پوللاری، گئنه قالاجاغیق!
– پول یوخدو قحبه.
– قحبه ننه‌ندیر، به نئینه‌دین فرشین پولون!؟
– قویموشام بانکا، دای بیر دانا چئسقیراتی فرش چیخادیبلار مینه‌جکلر باشیمیزا.
– بیر دانا ده‌ییر، خالچا (قالیچا) فرش ده‌ییردی؟ پولون نئینه‌دین؟ اوندان قاباقکی پرده‌نی!؟ …
– خشلندی دآ… یئمه‌یین خشلنمه‌سین.
– …
آرواد دئدیگی حئساب ده‌ییر کی یانی جاببارا اثر سالماز. «یئمه‌یین خشلنمه‌سین». بتر سؤزدور. یئمه‌یین
پالتار آلیم، یئمه‌یین پول ییغیم،… یئمک! جواب یوخویدو بونا. اوشاقلار بؤیودولر:
– ائله اول دن بیزیم بوغازیمیزدان کسیبسن پول ییغیبسان. «یئمه‌یین» نه‌دیر؟ به دده نئینر؟… هئچ گئنه بیرزاد اولماییبسان آخی، درد اوراسیندادیر.
جاببار یوگوردو آروادین اوستونه:
– سن بونلاری منیم باشیما چیخادیسان… هریاندا، همه‌شه منی پیسله‌دین، خینگ ائله‌دین….
آرواد داهی قاچمازدی، سیغینمازدی بوجاغا. آمما کؤتک‌ده یئمه‌زدی.
– قحبه‌نین بالاسی! آخیر بیرگون بئل ایلن ویریب اؤلدوره‌جه‌یم. اوغلانلارین بؤیویندن سن منی حئسابا قویموسان. اؤلدوره‌جه‌یم سیکه‌جم اوغلانلاریوین دا هارداوارین.
اؤلدورمک؛… اؤلدورمکدن واز گئچمیشدی، اونوتموشدو. “عابباس”ین آروادی “معصومه” اؤلنده یادینا توشدو یادا اؤرگشدی. عابباس نئچه ایل ایدی اوتراق اؤلموشدو. آریقلادی چورودو چؤپه دؤندو. هاممی گودوردو اؤلسون. عابباس اؤلمه‌دی، معصومه اؤلدو.
– کؤپویون ائششه‌یی لاپ میندار حئیوان دیر، او آروادی داییمن تاپداردی، قویمازدی چؤله زادا چیخسین.
راضیه دئدی:
– ساغ لیغیندا اریندن کؤتک یئدی، نوخوشلوغوندادا آلتینا اوستونه یئتیشدی. اوشاقلاری دا اینجیدردی آخی! ایندی نه دئدیلر نئینه‌دیلر اؤلدودا بئناوا…
نه دئدیلر؟! نئینه‌دیلر جاببار!؟. جاببار! نه قدر جاوان ایدین، ایشله‌دین تؤکدون آرواد اوشاغین خیتده‌یینیه، گونوز آخشاماجان فهله‌لیک ائله‌دین کی قودوقلارین کئف ایچینده بؤیوسون. ایندی ده آرواد قورور اؤتورور اوستووه. هانکی سینا دئینده گؤزون اوسته قاشین وار اوغول! آز قالیر توپورسون اوزووه. هه جاببار اوتوز ایل دن سونرا بئش اوچ قیران آیلیق صآبی اولوبسان، آرواد ایستیر دیغلادسین پولووی ییه‌لنسین، گئتسین آیری اره؛ سولندیگی یئرلردن حتمن بیرین تاپیب ساخلاییب باشی نین آلتیندا.
او واقتی یادیوا سال کی راضیه یالواراردی گئت دفترچه آل، دئیردین: من بیمه‌نی نئینیرم، قانیوین قیمتی جیبیمده – جیبینده‌یدی – بیمه ائله‌مه‌دین، کارفرماوا بیمه پولو تؤکدورمه‌دین، پوخ گونه قالدین، ایندی ده بئش قیران آرتیق اولاردی آیلیغین…
– گئت قوربان اول او اوشاغیوا با!، او قیرین قیرتی بیمه‌وی ییغماسایدی بیر یئره، ایندی هئچ اوستوراغادا صآب ده‌ییردین.
– تزه دانیشماق اؤرگنیبسن!؟
هه جاببار! عابباس نه دئدی، نئینه‌دی معصومه‌یه؟!
آخی اونون اوشاقلاری کیشی‌یه ساری ایدیلر، هره‌سی بیر یاندان دئیینیردیلر. منیمکی لر سفئح اولدولاردا، اوردادا شانسیم گتیرمه‌دی.
– آخی منیم ددم، نیه گونده گلیسن بیر اویون چیخادیسان اونون دا اعصابین قاتیسان اؤزووونده. بیزده کی آرادا پیتدیغیق… نه قدر دئییشسز یامانلاشساز نایراحات اولماریق، فیکریمیز قاریشماز…
– اوغول! سیز بیلمیسیز! اونو بوینوزا میندیرمه‌یین. گئدیر او هر یانی گزیر سولنیر چای چؤرک پیشیرمیر… آجیمیزدان اؤلدوره‌جک سیچا آغزیمیزا.
– یاواش یاخجی. سسین یئتدی قاپی اویانا قونشونون ائوینده.
– قونشولارین دا … .
جاببار قاپی نی چیرپدی، ائودن چیخدی.
– اوغول سیز گلین اوتورون یئریزده. سیزین ایشیز یوخدو. من بیلیرم اونون دردی هارداندیر؟ بویون باجیم ناهارا بیزده قالدیغینا او اوجور گؤی ایله گئدیر.
آروادین دئیینمه‌یی توتسا چتین دیر. سئچر تاپار قیرخ ایل قاباغین پوخلارین یاخار هر یانا. یاخجی سی بودور جاببار ائودن چیخیب اکیله‌سن... ائشییه چیخاندا بیر دلی گولمک ده توتار. هه هه. راضیه هله آخشاماجان قالاجاق دئیینه– دئیینه. آمما ائله بوجور اولوردا، بوجور اولور دئییر دئییر اوشاقلارین بئینین دولدورور، سنه نیفرت ائلیرلر اوشاقلار.
اوشاقلار نه دئییرلر کی جاببار: ایرمی دؤرد سآتی آروادلا ساواشماق یئرینه بیر فیکیر قیلئیدین بو یوخسوللوغوموزا. بایرام اولار تزه پالتاریمیز یوخ. اوشاقلارین گؤز تیکر قوهوملارین الینه کی منه بایراملیق وئره‌جک. اودوربا فیلانکس درس اوخویور دده‌سی ماشینین دا آلیب قویوب آیاغی نین آلتینا. بیزده بیلمیریک دنده نه‌دیر؟ فرمان نه دیر؟ اوجوزلوق وقتی ده آروادین فرش توخویوب، ساتیب ماشین آلیبسان، چیرپیبسیان اویان بویانا باتیریبسان... هئشزاد باشارمایبسان…
دیر ها دیر... زیر ها زیر، سؤیله‌ییر. اوشاق دا ائله ننه‌دن اؤرگشیر دئیینمه‌یی. هله او هئچ. باخیش لاریلا آدامی یئییرلر…
ائشیکدن گلیردی. اوتاغا گیریب دالیجا قاپینی اؤرتدو:
– چینزیر ایی گلیر نمنه…؟
اوشاقلار بوز بوز اوزونه باخیرلار:
– علئیکه سلام.
جاببار چؤندو آشپازخانایا، دیل آلتی: « اشی …یکدیرین اویانا. بییول دا سلامی منه دَرَک قرار وئریبلر. کؤپه‌ی اوشاغی هئچ بیری راضی ده‌ییر ائوه گلم». قابلامالارین قاپاغین گؤتوروب چیرپیر اوستونه:
– ننه‌ز هاردا؟
– خالاگیلده
– گؤروسوز!؟ ایندی سآت ایکی دیر خانیم سولنمکده، هله هاچاندان هاچانا گله بیزه ناهار پیشیره. دونن دن قالانی دا هلبت آتیب چؤله.
– گلنده آشقالا باخمادین!؟.
گولورلر؛ اوشاقلار گؤزلرین تئلویزیوندان چکمه‌دن گولورلر.
– اولان سیز نه هوش ائلیسیز!؟ آروادی اؤتورسن اؤز باشینا، ائوده لاپ قیزیل دا اولسا آتار ائشییه. آشقالا باخمالی‌دیر باخیرام.
– یامان دا ائله قیزیل ایله دولودور ائوین.
– دی اوغول دورون یومورتا دا وار بادیمجان دا، پیشیرین گتیرین یئیین دا، اؤز قارنیزادا یئمه‌یه غیرتیز یوخدو!؟ منیم اوشاقلاریم نیه بئله اولدولار آخی!؟
– سندن کی یاخجی‌ییق، ائوه گیرنده گؤرمه‌دیم بیر دفه سلام وئره‌سن. ائله یئتیشرسن: ننه‌ز هاردا؟… او سوفرانی نیه آچیق قویوبسوز؟ نه‌یه یاتیبسیز؟ نه‌یه قالیبسیز؟ نه‌یه گولسوز؟ هرزادا گیر وئررسن!
– آخی سن دئنن نه‌یه گیر وئریرم؟ علتی نه‌دیر؟
– ائله بونودا اونون دالیجان همه‌شه دئیرسن.
سوفرانی آچمیشدی قاباغینا، بادیمجانی، ساریمساغی دوغرامیشدی چؤره‌یین اوسته، بیرده پنیر.
« بونلاری راضیه اؤرگتدی بئله اولدولار. منکی ائوده اولمادیم، اوشاقلاری سآکی دلیل نصیحت وئریب دا. دئییرم اؤز قارنیزا گتیرین چؤرک یئیین آز قالیرلار چیخالار باشیما. اونا قالسا گلیب اوستن گلنلیک ائلییه‌جک: او بادیمجانی بیر بوشقابا دوغرایایدین دا... اک کیشی ده بیر سلقه آثاری یوخدو. او سوفرانی نیه اوجور بوزوشدوروبسن!؟ یاری‌سین دا چکیب قیچینین اوسته. آخی دیشین توتمور جیققیلی تیکه توت دا، ایکی اوغجون باسیر آغزینا، آدام یانیندا دا اوجور یئییر آبریمیزی آپاراجاق. اوشاقلاردا اونو تایید ائلیه‌جک: فیلان گون بئله اولدو فیلان گون هئله اولدو. اوشاق دا نئینه‌سین اونون الینین آلتیندا بؤیویوب دا، اوندان آرتیق نه اولاجاق!؟ یانی بونلارین جینسی خاراب دیر طایفالیغان ائله قانجیق دیرلار…»
اؤیدوکجه پؤرتوب قیزاریردی جاببار. اوشاقلار اوزانارکن باشلارین قاهاریب هردن بیر جاببارا باخیردیلار؛ سسله‌نیردی آخی: ذاتـ …ـکیم… سنی منه آلانی… سیـ…کؤپـ … ـکیم… .
بؤیوک اوغول دئدی:
– نه خبردی؟ نه اولوب؟
– دانیشدیرما منی حوصله‌م پوخدو.
راضیه یئتیشدی:
– آخ… یورولدوم! منه چای وئرین. آی! ائوی نیه بئله توکوبسوز؟… بالا نیه هامیز تیرلنیبسیز تئلویزین قاباغیندا!؟ دورون بیرگون ده اؤزوز ناهار پیشیرین دا. کیشی! سن بیر تیکه پیشیرئیدین بونلاردا یئیه‌دیلر اؤزونده!
– دانیشما! ائله هر ایشیزی من گؤروم! بیر قالیب گلیب نمنه‌زی ده یویام.
– یاخجی دای گئنه باشلامایین.
– اوغلان بونون الینه فیت وئرمه‌یین!… اؤلمورده یاخامیز قورتارسین.
– اؤلسه اوندان قاباق بیز اؤله‌جه‌ییک.
– به اورزه‌ز )عرضه‌ز ( اولسون دورون اؤزوزه چؤرک جورلییین یئیین دا. سیز آجیزدان اؤلرسیز من یوخ. سحر آروادلاریز دا مینه‌جکلر سیزی.
– ائله اودودا بیر بوغازیوی بیلیبسن بیر قارنیوین آلتین…
– جاببار! چؤره‌ییوی یئدین!؟ دو جهنم اول ائشییه…
– جینسیز خارابدی یئ. طایفالیغان منیم چؤرک یئمه‌ییمی گؤزوز گؤتورمز. الینده‌کی بلله‌نی چیرپیدی سوفرایا، دوردو آیاغا… اه‌ییلدی بیرده بلله‌سین گؤتوردو چیخدی…
»مئیدان چایی قان قیرمیزی دیر».
– هه هه… بولانلیقدیر دا هلبت یوخاری‌لاردا یاغیش یاغیب!
– اولان قیپ – قیرمیزیدیر… قانی گؤرموسن؟
– قانلی گؤزونله باخیسان… گؤزله کؤرپودن توشمه‌یه سن.
« سو ده‌ییر کی قان آخیر چایدا… »
کیپریک چال جاببار، گؤزلریوی اوغ... گئجه‌دیر سئچه‌نمیسن. جاببار! توشدون چایا... آ آ آ شاپ. دایازدیر، بوغولمازسان. قالخ آیاغا... اللریوه باخ! باش گؤزووه! قانلی دیر. لیژ قان هر یانیندان آخیر... قیپ قیرمیزی دیر. قارانلیق ایچینده بوغولوسان... هه‌هی هه‌هی لهله، لهله چیغیر…. چییینین ترپه‌نیر:
– جاببار! جاببار!
– آغاجان!… آغاجان!
– نه اولوب؟
– یوخو گؤروب حتمن… قیز بیر ایسکان سو گتیر.
هه‌هی هه‌هی نفس نفس ویر. گؤزلرین قاماشدی. چیراغ یاندی.
– ایشیقلیغا چیخاسان… گتدین سویو؟.
الیوی گؤزووون قاباغیندان چکیر:
– نه‌ییندی جاببار؟.
اؤزووو اولاندان بتر گؤرست. اوزونه باخما قوی نایران قالسین. آمما باخمیسان ده‌ییر؛ باخانمیسان، اؤز الینده ده‌ییر. سویو ایچ.
– بابا اوشاق ده‌ییر کی چیراقلاری سؤندورون قویون بئش دیقه یاتاق… هه؟ نه‌ییندی آغاجان؟ بیر یئرین آغریییر دؤکتوره گئدک؟
سویو ایچ. دئنه:
– یوخ.
– اوره‌ییمیز اوزولدو. یاخجی سان ایندی!؟
باشیوی اه‌ی. ایندی باخ اوزونه، باخابیلرسن. چیراق سؤنوبدور. اوزون راضیه‌نین اوزونده... هئچ نه گؤرموسن...
جاببار! دونیاده گرک کئف چکه‌سن. ایندی یه‌جن باشارماییبسان!؟ ایندی باشار. شوکور آللاها ایندی بئش اوچ قیران آیلیق صآبی اولوبسان. هله جانین دا وار، ایشلرسن. سونراسی گئت گز دولان کیشی لیگه باخ. آرواد کؤهنه‌لیب؟ تزه‌له: « قونشولارین دا دوللارین دان بیر دانا فیتیلی فیتین آللام بیزده بیر گون گؤرروک».
او “سریه” یه دئسم الیمدن اؤپر گلر. آغ آپباق بدنی وار ائله‌بیل پامبیق دیر؛ اؤلو دیریلدندیر ییه‌سی اؤلموش. آروادی بیر یانلیق ائله‌سه‌یدیک. « قالسا قویماز! قحبه شو وه‌نی سالار محله‌ده باشیمیزی قووزایانماریق.
اوشاقلاردا یئکه‌لیب. ائولندیر اؤتور ائشییه. اؤزلری اؤز باشلارین دولاندیرسین. ناواغاجان من خشلیکلرین وئره‌جه‌یم. بوراجان دا بئجرتمیشم، چوخ دور. فقط او قیزا گرک یئتیشیم. گئجه هئچ بیرینین وئجینه ده‌ییردی، او دوردو سو گتدی. یاداکی اوغلانلار منله ال- بیر اولسونلار خیردا – خیردا دئیینیب تاپداییب دیغلادیب اؤلدورک آروادی. مونتاسی )منتهاسی) ائلییه‌نی ده‌ییر لر جاببار! اونلارین رایی آرواددیر. اؤزووه گرک چاره قیلاسان. گئدیم بیر عابباس‌لا گه‌ییشیم گؤروم نجور اؤلدوردو؟... یوخ… اودا سونرا گلر شاهد گئچر کی جاببار اؤلدوروب. آپاریم چؤلده آزدیریم؟، چایا آتیم؟... اوشاقلار ال چکمز کی هانی ننه‌میز؟ ماشین دا ویرمیر یاخامیزی قوتارا. اوتوخا اؤیره‌لی اوتوباندا ماشین بیر آروادی باسیب، قاچیب... بیزده او شانس لار هاردایدی؟
هه جاببار! دئییرلر اوتوبان دا چوخ آدام اؤلور قانی آرادا گئدیر. خارابانین چیراغی زادی یوخدو. جماعت آتلایاندا ویریب اؤلدورورلر قاچیرلار. سایخین دا بیر یئر.
مشد حسین گیلین ائولری اوتوبان ایله یاخین اولور. بیرجورلویونن گرک گئجه گؤزو یوللویام اونلارا.
– ناوار مشد حسین گیلده؟
– دئییر آروادی مریضدیر. بیرده ائله گئدک گؤرک نئینیرلر؟ نجوردولر؟ سن اوتوباندان چیخارسان، منده تعزیه یئرینه گئده‌جه‌یم اوردان گللم.
– ائله قئیت گل ائودن بیر چیخاریق.
– آخی یوباناریق گئجه اولار!
– اولار صابا گئدریک.
– همه‌شه منیم سؤزومو ترسه‌یه دؤندر. اوشاقلارین دا یانیندا خینگ ائله اوبیرسینین ده.
– بابا دای دئییر گل بیرلیکده گئدک دا نه ایستیسن؟
– اوغول! طرفدارلیق ائله‌مه‌یئ سنه جایزه وئرن یوخدو!
– گئش گئت گئده.
لاپ یاخجی جاببار... تک گئتسه ائهمال گئدر ماشین زاد ویرماز. اؤز اؤزونه ماشین ویرماز کی آدامی. یا گرک کئفلی اولاسان یادا... بیری ایته‌لییه ماشینین قاباغینا.
– اولسون صابادا بیری گونده گئده‌ریک.
بوگون بیر چیخ گؤر هارا هارادیر؟ یول یولاق نجوردور؟ اؤز – اؤزونه ده‌ییر کی آدام اؤلدورمک… استغفرالله... گئده سفئحلیییبسن؟ نه فیکیر ائلیسن؟ کافتار وقتینده تزه سوداکار اولموسان! به یوخ!؟ قوی دیری قالسین عذاب ملائکه‌سی‌دیر ویرهاویر دئیینسین اوشاقلاری دا قوشقوتسون. ایشله‌دیب پوللاریوی الیندن آلسین، ائوه‌ده قویماسین. اودوربا “سریه” گول کیمی خانیمدیر. رحمتلیک اری دئیردی: نه دئسم دئیر باش اوسته. ایشاره‌دن سؤز قاناندی دا ائله بیلینیر، ساکت، باش آشاغی. قاپیلاریندان کئچنده چادراسین بیر آچیب اؤرتر؛ اوزو قیزارار ائله‌بیل قیزیل گول دور. رحمتلیک اونون قدرین بیلمه‌دی اؤلدو گئتدی کؤپوی اوغلو... حئییف ده‌ییر سن آللاه... اونو آللاه منه قیسمت ائلییه‌یدی…
یازیق جاببار! سنینده یازین فهله‌لیگه هانباللیغا یازیلدی. یئریمه‌یی باشارمامیش دده‌ن یوللادی ایشه. ایشله‌دیگیوی ده آلدی آپاردی وئردی ماللالارا، سیدلره... ایته قوردا، کئفه… یئمکدن آلدی تؤکدو قارنینا: اوغلوم گئدیب سرباز، چؤرک بوغازیمدان لونبا لونبا گئدیر!... ائله‌کی آیریلدین قیریب قاچیب گلدی گیردی ائویوه. یئدی پیسیتدی دولدوردو ائوی: « ناماز قیلمایان ائوین چؤره‌یی حارام دیر». جاببار دا اینک‌دیر، اورک یوخدو کی دئیه: « حارام دیر یئمه‌دا»… سونرا ایشله اوشاق بؤیوت آرواد ساخلا اولسونلار سنه عذاب ملائکه‌سی…
گئده غریب قارانلیقدیر بورالار! هئچ ماشین سورن ویرسادا بیلمزکی آدام ایدی ویردی یا ایت ایدی!؟ گؤرمک اولمازکی! او تای داغدان قورد دا گلیب آدامی یئیر با. او کؤپوی اوغلو مهندس ایکی گون موزدومو یئدی وئرمه‌دی، گتیره‌سن بوردا باشینا اویون گتیره‌سن یا بییول ایته‌لییه‌سن تیرئلی نین آلتینا …یکه‌سن هاردا حق یئین وار نکوارین )نه کی وارین(. هه جاببار بورا یاخجی یئردیر کیمی ایسته‌سن وئره‌سن اؤلومه، آرادان چیخاسان. ائله یولو بودور یاخجی تاپمیشام. بورالاردا آروادی وئره‌جه‌یم ماشینلارین دمینه. آمما! آمماسی وار. بو خرابه‌لر اوتوبانا یاخین تیکیلیب. بیرآز شاققا شوق اولسا آداملاری سسه گلرلر. گؤرن اولسا بییول؛ توتوب آسارلار. سریه‌نین ده بالین داهی دادانمازسان... قوی گؤروم نئینه‌مک اولار؟ بودور! بو قایا یاخجیدی. بیردن آرا قاریشسا بونون دالیندا گیزلنمک اولار. سونرا دا اوردان چیخیب او دربندلردن یئننم آرادان چیخارام…
– چکیلین دالی یا قویون ویرسین اؤلدورسون.
– استغفرالله… دئییرم دینمه جیندا. سن آخیر بو دیلیوین اوسته منیم الیمده اؤله‌جکسن.
– الیندن گلر الیندن گلر. آللاه شوموره لعنت ائله‌سین…
بیرینده چال گؤزوندن جاببار! ویر، ویر. آرواد کی کیشی‌یه اه‌یمه‌دی گرک اؤلسون. اوشاقلار… اوشاقلار اللریوی ساخلاییبلار... نئجه... نئجه قویمادیلار اؤلدوره‌سن!؟
او ددم ایدی منی هانبال ائله‌دی، ایشلتدی یئدیتدی قوهوم قارداشینا ناوار ناوار!؟ ماللا دایی سی هر یاندا دئیه‌جئیدی: فیلانکس یاخجی ائششک دیر. یئ جاببار! یئ!
قارداشلارین ایش آلتیندان قاچدیلار. ایشله جاببار! ایشله آبری ساخلا. فهله‌لیک ائله، او ایش صآب بو ایش صآب حققیوی یئسین، دینمه جاببار دینمه. ددن دئییب دینمه، داوا ائله‌مه، ساواشما، اینک اول …ایشله قازانجیوی گتیر قوی آروادین اوغجونا؛ خشله‌سین ائنینه بویونا، آخیرده‌ده اؤزووه لعنت اوخوسون، اوشاقلاری دا قوشقوتسون اوستووه... « منه یازی یازانین قلمین …یکیم». ائله گلنده گئدن‌ده قیچین قووزادی سنین اوستووه… اؤلمورسن‌ده اوزون قوتولسون. اؤل جاببار اؤل.
یوخ اولماز. هامی دان یئییبسن جاببار داهی آرواددان یئمه. آرواددان یئسن، آرواددان اسگیک‌سن... ائله بو گئجه بوردا اؤتوره‌جه‌یم ماشینین آلتینا یاخام قوتولسون. بوردان اویانا بئش – اون گون یاشاییب سونرا اؤلم …یکدیرم. بو خارابا قارانلیقدا، بیر اوغوج قان هئچ کؤپوی اوغلونون گؤزونه گلمز.
جاببارین یانی بوشالدی. دایاندی. راضیه الیله دؤیره‌بری گؤرسه‌دیردی…
داهی بوندان آرتیق نه گله‌جک باشیوا!؟ بیر عؤمور عذاب چکمک‌دن اؤترو یارانمیشیدین!؟ باشا وئردین.اؤلونون بوینوزو اولماز کی!. جانیوی قوتار، یاخاوی قوتار بو آرواددان؛ سنده بیر گونه چیخ، سنده یاشا. یا بییول توتوب آسارلار یا بییول بئش – اوچ گون یاشارسان.
– اوستو باشیمیزدا تئ زیغ اولدو.
جاببار باخدی آیاقلارینا. دیزه‌جن زیغا باتمیشیدی. دینمه‌دی. راضیه بیر گؤز آلتی اوزونه باخدی. سووشدولار گئتدیلر.
قایا یاخینلاشیر. یئری بورادیر جاببار! ایندی وقتیدیر.
اوره‌یی دؤیونمه‌یه باشلادی. اوزو بیرآز پؤرتدو. باشدان آیاغا ترله‌دی. قارانلیق داها قارانلیقلاشدی؛ زیل قارا. یاپیشدی راضیه‌نین چییینیندن بیرده بؤیروندن. اللری تیتره‌دی. تیرئلی یا پئیکان. چیراغی توشدو گؤزونه… راضیه‌نین گؤزو اوزونده‌یدی. باخدی؛ جاببار باخدی راضیه‌نین اوزونه… یاپیشیدی چکدی قیراغا. سیقنال سسی گورولدادی سوکوتدا. گئتدی قیرمیزی داغلارا ده‌ییب قاییتیدی. راضیه قورویوب قالمیشدی. دینمیردی. باخیشی‌ایله سوروشوردو. جاببارین دیل دوداغی اسیردی.
اولسون جاببار! قارانلیق قویماز راضیه اسمه‌ییوی، ترله‌مه‌ییوی، قیزارماغیوی گؤرسون. نفس آل، درین نفس آل؛ سس سیزدن، قارانلیق سسی ساخلاماز. دیله گل. گرک بیر سؤز دئیه‌سن. دوداقلاریم!، انگیم! اسمه‌یین. دیشیلریم! بیر- بیریزه چیرپینمایین. اور ه‌ییم آتلانما. گؤزلریم دول، دول بونلارین سس لرینی کس:
– سن یئری… من پئشاب ائلیم بوردا.
بیرنین سولانمامیش سسین ده‌ییشیلمه‌میش، قایانین آرخاسینا گئچ. ایندی راحات سان. آرواد هله گئتمه‌ییب. اینانماییب!؟ قئییشیوی آچ. شاققا – شوق ایله آچ. اللرین تیتره‌ییر. اوره‌یین آتلانیر. دیلین توتمور:» جاببار! جاببار به نه قئییریردین؟». اوره‌یین بولانیر. آغزیوین سویو دورمور. ایسته‌میسن دورسون. اوتور یئره. اوتور، الینله آنلیوا چال. هؤنکورمک لازیمدی. قارانلیق آخی سسی نیه ساخلامیر!؟ «به منیم یازیم نیه بئله یازیلدی؟!». آروادی ایته‌له‌ییردین ماشین آلتینا!؟ هیچقیر، سیزیلدا... نجور آدامسان به سن؟ ایکی اللی اوزووه چال. « به بیز نیه بئله اولدوق آخی!؟» هی‌هی‌هی… باشیوی قایایا چیرپ، چیرپ، چیرپ. آلنیوین تری قاشلاریوین اوستونده، گؤزلرین دولو. بیر شئی گؤرنمیسن. کیپریک چالما... کیپریک چالما گؤز یاشین آخار… آغلارسان. هارای چکمک لازیمدی. بوغازین دولو. هانسی کؤپوی اوغلو دب قویوب: کیشی‌لر آغلاماسین... چیرپ چیرپ چیرپ باشیوی قایایا.
آغلامیرسان ده‌ییر جاببار!، یئل؛ گؤز یاشیوی یاناغیوا دوشمه‌میش گؤتورور آپاریر قایانی دولانیر، یاشلاری بورقانا سالیب سپه‌له‌ییر راضیه‌نین اوزونه. یئل‌لیک هاوادا آدام دئیر بس اوزونه یاش ده‌ییر.
راضیه! سن کیپریگیوی چالیبسان. گؤز یاشلارین انگیندن دوشور یئلین قوجاغینا. سن اوتوز ایللیک اریوین جیگگی – بؤگگون بیلیسن. او پئشاب اوچون گئتمه‌دی اورا. ایتیرمه اؤزووو؛ گؤزیاشلاریوی آخیت. اللریوی اوزووه چالما. اوووردلاریوی جیرماقلاما. کیپریک چال، گؤزیاشی آخیت. ایسته‌ییردی ارین اؤلدورسون!؟ دونوخوب باخ قارانلیقدا قایایا. دیزلرین اسیر. اه‌ییل اوتور. اللرین هاردا؟ باشیوا توپراق سووور. « ننه! نه‌یه دوغوردون منی!؟». سس ایله آغلا. هؤنکور.
یوخ، یوخ. اولان ایش ده‌ییر. جاببار هر نه ده اولسا بو ده‌ییر. کیپریک چال. « شئیطان گیرمیشیمیش جلدینه». قره باسیب. آز سینسیمه‌ییب کی... اوره‌یین پاتلار ایندی. دور گؤر نه ایش گؤرور.
جاببار باشین داشا چیرپیر سیزیلداییر. باشی نین اوستونه قون. کرشابی چک کوره‌یینه. جاببار! دیسکینمه. اوزونه باخ. بوبئله ایلی سنینله سینسیین‌دیر، دینمه‌ین‌دیر. باش باشا وئرین. هؤنکورون. یئل؛ هؤنکورتونو داغلارا سالار. داغلاری قیزاردار. قیرمیزیسی زیل قارانلیق ایچینده گؤزو چیخادار.
اکبر رضاپور – دانساو
۹۲ قیش آرا آی
After exploring a number of the articles on your website, I seriously like your way of blogging. Federica Cross Alberic
thanks