ائو | علی احمدنژاد

ائو | علی احمدنژاد

داها دیزلری دیکلمیردی. داغدان یئنن دوماندا یئره دوشمه لی ایدی، یوخسا نهایت داغی یئننده، دوماندا. دوداغ آلتی دئدییی سؤزلر جنوارلارین اولاماقلارینین اوستونه دوشوردو. “کیشی یئری، سن هله-هله ییخیلمازسان، من تانییرام سنی!” گاهدان قالین سسله دئییردی، گاهدان اینجه سسله. اوره یی او سؤزلرله قیزیشمیردی، اولاماقلارلا دا آرتیق سویوموردو. هردن بیراز چیرپینیردی. اینجه سسله دانیشاندا، آناسینی یادینا سالاندا. بیلیردی یئریمک اؤیرشدییی گوندن ان اونملی یئریشی دیر بو. بیلیردی آناسی بیر زامان یئریش اؤیره دیب سه هئچ اولماسا او آن نتیجه سینی گؤرمک ایسته ییر. دیزلری بیلمیردیلر بونو.
یولداشلاری گیزلیجه آتدیملارینی ایتیلدمیشدیلر. بیلیردی. گیزلیجه دؤنوب اونون دالی قالماسینی یوخلایاراق ییخیلماسینی گؤرمک ایسته ییردیلر. بونو دا بیلیردی. چالیشیردیلار اونو جنوارلارا وئریب اؤزلرینی قوروسونلار. او تکینه بیر سورو جنوارین گؤیلونو دویوراجاق سانیردیلار. جانسیز ساغ قولونو قالخیزاراق بارماقلارینی دستمالا ایلیشدیریب اوزونو آچدی. ایچریدن گلن هاوا هله ده ایستی ایدی. هله ده دومان ایچینده بوغلاییردی. سئزمیشدی اوزونو گؤرسه لر آتدیملارینی بیراز یاواشیدارلار بلکه، هئچ اولماسا اوزونو گؤره-گؤره ییخیلماغینی گؤرسه لر راحات اوزاقلاشا بیلمزلر. بیر ده دؤنوب جنوارلارا باخدی. حوصله ایله یالقیز قالماغینی گؤزله ییردیلر. دوداغ آلتی قالین سسله بیرده دانیشدی. “قارداش یئری، ییخیلما” سونرا یالوارما لحنی توتدو، عینی سؤزو بیر ده دئدی. بیر ده گئری باخدی. دیشلرینین نئجه باتماسینی، نئجه یئییلمه سینی تصور ائلیه بیلیردی. بدنینین تکجه دیشه گلن اتی قیچلاریندا ایدی. قالان یئرلردن ات چیخارتما زامان آپاراردی. دوشوندو اوزونو ده ییه جکلر. بویوک لرینین بیری بوغازیندان یاپیشاردی. لاپ آج، لاپ اوره یلی لری ده اوزونو یییردی. یولداش لارینی چاغیرماق ایسته دی. چاغیرمادی. بیلیردی چاغیرسا دا ائشیتمه میش توتاجاقلار. ائشیتسه یدیلر ده، اوزلرینه گتیرسه یدلر ده، نهایت بیر ده دؤنوب باخاردیلار. دایانیب، جنوار قاباغیندا اونلا قالمازدیلار. هامیسی اونو تانیییردیلار، اوقدر یولداش ایدیلار کی اؤز باشینا اؤلسه یدی اونو باسدیراردیلار. ییخیل سایدی، ناخوشلاسایدی، آزیب اؤزونو اؤلومه وئرسه یدی، لاپ اؤزو اؤزونو اؤلدورسه یدی ده یئری قازیب اونو باسدیراردیلار. یئر نه قدر برک، هاوا نه قدر سویوق اولسایدی دا. یولداش ایدیلار آمما جنوار قاباغیندا بوراخماماق قدر یوخ. جنوارلار دا اونو تانیییردیلار سانکی. امین ایدیلر تئز گئج یالقیز قالمالی دیر، ییخیلمالی دیر. آج اولسایدیلاردا مطلق تله سمیردیلر. حوصله ایله سون آتدیملارینی گؤزله ییردیلر.
دوماندا، داغی یئننده، ایتلری هوره رک اوستونه گلمکده گؤرنده، بیلمه میشدی نئیله سین. اوره یی بیلمه میشدی گؤونسین یا بوشالسین. بیلمه میشدی ایتلر اونو تاپیب آداملارا وئرمه لی دیرلر یوخسا آداملار اونو توتوب ایتلره. بیلمه میشدی جنوارلاردان قورخسون، ایتلردن، یوخسا آداملاردان. آمما بیلمیشدی داها یئریمک اوچون یئر یوخدو، بونو دیزلری ده بیلمیشدی. آغزی اوسته ییخیلمیشدی. قوللاریندا دا جان اولمامیشدی اوزونو قوروسون.
*
سحر گون باتاندا آغلی باشینا گلمه میش گؤزلرینی آچمیشدی. نه اولدوغو یئری نه قادینی نه ده آغریلارینین عیللتینی سئچمه میشدی. سانمیشدی آناسینین یانیندا دیر، بیرده یاتمیشدی.
گون بیرده چیخاندا آییلدی. قادینین اوزونون تانیش گلمه مه یینی سئچدی. قاشیغین ایستی سی یارالی دوداغینی یاندیریردی. دوروب دیک اوتوردو. قیچلاریندان قابیرقالاریناجان، بارماقلاریندان بورنوناجان هر یئرینده کی حیسی واریدی، آغری حیس ائله ییردی. پنجره دن سولقون ایشیغی گؤردو. بیلمه دی گونش باتیر یوخسا چیخیر. سوروشماقدا ایسته مه دی. آرتیق هئچ نه اؤنملی گلمیردی. سس سیز اوشاقلیق چاغی کیمی قاشیق-قاشیق آشینی ایچدی. سونرا اوتا دونوخوب فیکره گئتدی.
قادین ایسته ییردی ایلک سؤزو او دئسین. دینمیردی. دینمه دیکجن داها کنجکاولاشیردی، داها دینج قالابیلمیردی. آمما کیشی دینج ایدی، سانکی دئییلمه لی هئچ سؤزو یوخویدو. گون باتاندا قادین آرتیق دینمه یه بیلمه دی. او راحات اولان قدر اؤزو اؤز ائوینده راحات دئییلدی. داها سانیردی اؤزو اونا پناه وئرمه ییب. سانکی او ائذن سیز ائوینه کئچمیشدی.
“کیمسن؟” سوروشدو، شوبهه دولو لحن ایله. چاشقین قادینا باخیب بیر ده اوتا دونوخدو. سوالی قریبه ایدی. جوابینی بیلمیردی. بوتون حایاتی یادیندا ایدی، جزئیاتیلا. آمما کیم اولدوغونو بیلمیردی. آدینی دئمه لی دئییلدی. بیلیردی. باشینا گلنلری ایسه آغیزا گتیرمک ایسته میردی.

“یولداش لارون نیه سنی تک قویدولار؟”. باشینی قالخیزیب قادینین آغیزینا دونوخدو. اوزونون یارالاری قورخولو گؤروندوروردو اونو. بونسوز دا قادین، بیریسی اونا دونوخماغا اؤیرشمه میشدی. اؤزونو ایتیردی. باخیشینی چکدی. دالینی چئویریب پنجره دن داغلارا باخدی. داغلار اونا اوره ک وئریردی. “یولداشلاری اولسئیدون سنی تک بوراخمازدیلار!”. بونو دئییب چؤله چیخدی.
قاپینی اؤرتوب داغلاری گؤرمکله، یاواش-یاواش بیر ده اؤزونو دینج بیلدی. گونشین اوت بویا ایشیغی داغین دالیسیندان گلیردی. گئجه اوچون بیراز اودون قیریب دولچایا ییغدی. دولچانی گؤتورجک یالقیز اولماماغینی خاطیرلا دی. اؤیرنمیشدی یالقیزلیغا. قاپینی آچیب آیریسینی ایچریده گؤرمک ایسته میردی. قاپینی آچدی. کیشی پتونو باشینا چکیب یاتاغیندا اوتورموشدو.
یئرینده دوردو. گؤیولسوز، مجبورا قاپینی اؤرتدو. گؤزونو اوندان آییرمادان دولچانی اوجاغین قیراغیندا یئره قویدو. صندلینی چئویریب اوتون قیراغیندا اوزو کیشی یه اوتوردو. گونش سولموشدو. کیشی دبرمه دن پتو آلتیندا قالمیشدی. اوستونده اوتون ایشیغی تیتره ییردی. قادین سون سؤزونو دئمکدن پئشمان ایدی. دئمیشدی کی او اؤزوندن آرخا چیخسین. تقصیری یولداشلاریندا گؤرستسین آمما او دینمه دن بویون آلمیشدی. اونون حاققیندا یاخچی حیسسی اولماماغینی ایسته میردی بویون آلیب بیلیندیرسین. بیلیندیرمیشدی آمما. یالان دئسه یدی اؤزونو گیزلی ساخلایا بیلردی، بو قدر یالقیز قالمازدی.
گئجه دوشدوکجه داها امنیت سیزلیک حیس ائله ییردی. گون باتاندان اوتا دونوخموشدو. فیکری قاریشمیشدی گئجه نی نئجه یاتسین. نهایتده یاتاغینین قیراغینا بیر پیچاق قویوب کیشی نین آشینا ایکی یوخو داواسی آتماغی چاره گؤرموشدو. آشی قاشیق-قاشیق ایچیردیب پیچاغی دقتله، گؤتورمه سی لاپ تئز، لاپ راحات اولان یئره قویموشدو. هر ایت هورنده، پیچاغی برک یاپیشیب هر جنوار اولایاندا یاتماغا چالیشمیشدی. سحره کیمی یاتا بیلمه میشدی.
کیشی گون اورتا آییلمیشدی. داوالارین اثریندن داها فیکیره باتمیش، داها دینمز. قادین ایسه یوخوسوزلوقدان داها تشویشلی، داها راحاتسیز. گئجه نی صوبحه جک اونا یئر وئرمه سینه فیکیرلشیب تام یانلیش اولماغیندان امین اولموشدو.
یالقیز بیریسی، هئچ کیمین گؤزو اوستونده اولمایاراق یاشاماق ایسته سه گرک هامی یئرینه گؤزو اؤز اوستونده اولسون. سحر یاتاقدان قالخاندان پیچاغی دا گؤتوروب اؤزویله دولاندیریردی. داها اونا دالینی چئویرمیردی. گؤز آلتی گودوردو. گاهدان اؤزونو نئجه پیچاقلا قوروماغا فیکیرلشیردی گاهدان اونو ایچه ری گتیرمه یینه، پئشمان چیلیغینا. گونش سولدوقجا قادینین اوره یی کدرلنیردی. یوخو داوالاریندان اوچو قالیردی. کیشی ده توختاییردی. پیچاغ، نه قدر برک الینده توتسایدی دا یوخو داوالارینین یئرینی وئرمزدی.
آخشام داوالارین اوچونو ده ازیب آشینا تؤکدو. ایچیرتمه سینه اوره یی اولمادی آمما گؤز آلتی باخاراق هامیسینین ایچیلمه سیندن امین اولدو. یاتاغینا کئچیب پیچاغینی برک یاپیشدی. آزجا سونرا کیشی نین خورولتو سسی گلدی. پیچاغینی بوشلاییب یاتماغا چالیشدی. گلن گئجه داواسیز نئیله یه جه یینین فیکری قویمادی. اؤزونو لاپ چاره سیز دوشوندو. کیشی بیر ده آییلسایدی آرتیق یاتماغیندان امین اولا بیلمزدی. یاتا بیلمه دی. بیلدی یاتا بیلمه یه جک. دیک اوتوردو. پنجره دن آیی گؤردو. ایشیغی ایچری ساچیردی، داغلار دا ایشیقلانمیشدی.
اوره یی چیرپینماغا باشلادی. اوزو گچ کیمی آغاردی. دوردو. بیر لیوان سو ایچیب کیشی نین باشی اوسته گئتدی. اوره یی داها برکدن چیرپیردی. کاپشئنینی گئییب پیچاغی ساغ الینده برک توتدو. کیشی نین چییینلریندن یاپیشجاق تؤششومه سی باشلاندی. سورویه-سورویه قاپیدان چیخاردیب دره قیراغینا آپاردی. نفس چکمه یئرینه چیغیرماق ایسته دی. آییلماغیندان قورخدو. دره نین قیراغیندا چییینلرینی بوشلایاراق دایاندی. داها بیلمیردی نئیله سین. چیغیرماق ایسته ییردی. قیچلاریلا یئری تپیک له ییب قاچماق ایسته ییردی.
قیچینین بوتون گوجویله اینجه بدنی ایته له دی. ایته له یرکن چیغیریب قاچدی. ایتلری قاپی آغیزینا باغلاییب قاپینی ایچری دن کیلیدله دی. یاتاغینا کئچیب هؤنکورتویله، ایتلرین هورولتوسویله، آناسینی چاغیراراق آغلادی.

بو حئکایه، تبریز بیلیم یوردوندا کئچیریلن قیسا حئکایه یاریشماسیندا بیرینجی لیک قازانمیش دیر.
بو یاریشمادا یئر آلان حئکایه لر:

۱)بیرینجی: علی احمد نژاد( ائو)
۲) ایکینجی: سجاد عادلی( قرمز)
۳) اوچونجو: هادی حیدری‌راد( اشک‌های سرد)

بو یاریشمادا،  سایین احد فرهمندی،  رقیه کبیری و روفیا شیری‌خان داورلیک ائتدی لر.