پنجشنبه, اسفند ۳, ۱۴۰۲
اؤیکوامضا درگیسی

تبسم عبدالله زاده | یوواسیز

تبسم عبدالله زاده | یوواسیز

گون اورتایدی، شوربا اوجاق اوسته پیشیردی، قادین یئرده اوزانیب ائوین توفاغینا گؤزتیکه _رک اؤز عالمینده سیرائدرکن  دیل آلتیندادئییردی:

_اوغلوم گل بو داشلاری اتگیندن تؤک، …

*

آش گؤیو،کوکو گؤیو، یئمه لی

گؤی سسلمه سی کوچه دن اوشاقلارین های کویوایله قاریشیب ائوه باش اییب قادینین

باشین قازمالاییردی.

قیزی چادراسین حیطده کی شریت دن گؤتوروب باشینا آتیب کوچه دن بیر باغلی یئمه لی گؤی آلیب حووضون قیراغیندا

تخت اوسته قویوب تئزپیلله لری چیخدی ،خالچانین آلتیندان مین تومن پول گؤتوروب

گؤی لرین پولون وئریب ایچه ری قاییتدی.قادینین ألیندن توتوب سؤیله دی:آنا گل سنی حیطه آپاریم هاوان دئییشیلسین

قادین سَمَله لر کیمی آیاغا قالخیب آشا آشا یولا دوشدو پیلله لری بیربیر أنیب حووضون قیراغیندا دایانیب یئره اوتوروب نه ایندی نه دیندی.

لیلا آناسین اؤز حالینا بوراخیب باشی قاریشدی گؤیلری آریتداماغا،

قادین ائشیک قاپیسینا

گؤز تیکه _رک یئنه باشلادی سایاغلاماغی

_ کوچه یه چیخیب اوستو باشی توزتورپاق قاییداجاق دئیه دئیه بیردن بیره ائوه ساری قاچدی پیلله لری تئز چیخیب اوتاغین قاپیسین چیرپیب پالتار کومودوندان بیر قهوه چانتا یئره سالیب ایچیندن بالاجا بیر دون گؤتوروب حیطه قاییتدی حووضون قیراغیندا آیاغی بیر ساخسی گولدانا ده ییب گولدان یئره دوشوب سیندی اعتنا ائیلمه دن  هؤیله _سک بالاجا قیزین توز تورپاق لی پالتارلارین سویوندوروب ال اوزون یویوب دونو گئییندیریب

منیم نازلیم دئیه رک قیزی قوجاقلاییب ایپک ساچلارین گوجسوز بارماق لاری ایلا بیریانا داراییب اؤپوش یاغماسین بالاجا قیزین ال اوزونه گؤز باشینا یاغدیریب تیتره ین سسی ایله دئدی: داها کوچه یه چیخیب اوستو باشینی توزتورپاق لی

ائله مه نازلی،  شَهَرین کوچه لری قالابالیق دیر،چیخما چؤله دیلیم لال ،باشینا بیراویون گلر نازلی بالام.

لیلا آناسینین اؤزیله دانیشماغینا اوزولوب گؤی لری ییغیب ائوه گئدیب بیر حب بیر لیوان سو گتیردی

انجیر آغاجینین یام یاشیل یارپاقلاری تختین اوستونه کؤلگه سالمیشدی،آناسین زحمت ایله  تخت اوسته قویوب حبی آت دئدی. قادین حبی تز آتیب لیلانین اللرین الینه آلدی. ویاواش یاواش بیله سین هوش آپاردی ،لیلا باشی اوسته اوتوروب آناسینین خسته لیگینن ال به یاخااولماقیناایچینده آغلاییب باشلارینا گلن بلالارا

فیکیر له شیردی

کی آناسی گؤزلرین آچیب دئدی:

کندیمیزدن کؤچن گون ائله توفاغیمیز داغیلدی قیزیم.

لیلا اللرین یاواش اللریندن آییریب آناسینین دن دوشموش ساچلارین ییغیب چارقادین آلتینا

سونرابیردنه ده حب آناسینین آغزینا قویوب سویو ایچیتدی.

قادین باشین توولاییب داها بوآجی داوالار منیم آجی روزگاریمی شیرین ائتمز آنجاق دردیمی آغیرلادیردئیب دیزلرینه ووروب داوام ائتدی: یوز یول دئدیم اوغول سئل قیراغیندا ائو سالان یوواسیز قالار آمما کیمیدی ائشیدن،

گلینیم گئدن گون ائویم ییخلیب قاپیم باغلاندی،کندیمیزدن کوچدوم جلالیم داغیلیب

بو یابانجی شَهَرده اوره ییم داغلاندی…

قادین سیزیلدایا سیزیلدایا

گؤزلرین یومولدو.

لیلا دیل سیزداماق سیز بیر بوجاغدا اوتوروب دویونجا آغلادی اوره گی داریخمیشدی کندلرینینه باغ باغاتین آغاجلارینا،داغ کؤوشنینه، آخشاملار بولاغ اوسته قیز گلینین سؤز سووونا ،دئییب گولمه سینه گون ایستیسی چای قیراغیندا پال پالتار یوماق بولاغ اوتی بلله سی یئمه یینه، حیس ائدیردی حیطین کوهنه کرپیج لری، قاپ باجانین سینیق سالخاق در دمیری،  سارماشیقلارین دووارا سوواشان سارالمیش قول بوداغی، سینیق ساخسینین سولموش شمدانی لاری حوضون قیراغیندا ایسلاق دون ،حیط بوجاغیندا اجیزا اشیا…

اونا آغیز اییر.

****

انجیر بوداغلارینین آراسیندان گونش ساچاقی بویلانیب،ایشیلتی قادینین گؤزونه دوشوب یونگول یوخوسون قاچیدی گؤزلرین آچیب اطرافا دولاندیردی یئنه گؤزو حووضا ساتاشیب دوروب قاچا قاچا پیلله لری چیخیب چانتانین یئره تؤکولن پالتارلاریندان بیر دون گؤتوروب

حیطه قاییتدی آماداوالارکارائلییب نازلی نی اوردا گؤرمه دن دیدرگین کوچه یه ساری قاچیردی کی لیلا اونو قاباقلاییب حیط قاپیسین کیپله دی سونرا یالوار یاخاری ایلا آناسین آپاردی یاتاغینا ،هؤیله سک بیر لیوان سو ایکی دنه حب گؤتوروب قاییتدی، حبلری سویونان بوغازینا تؤکوب آناسینین زیل قارا گؤزلرینه گؤز تیکیب دئدی: آنا  گئجه ایلان ووران یاتیب سن نه اؤزون باتیب نه سیزیلتی لاریندان منیم گؤزوم باغلانیب بیرآز هوشلان.

قادین سؤکولموش گؤزلرین لیلانین ایسلاق یاناق لارینا ،یورغون باخیشلارینا تیکیب _قیزیم، گئجه کندیمیزین داغین شلله لییب چیینیمه کؤوشنه آپارمیشام، کؤوشنی ییغیب اتگیمه چایاآخیدمیشام ، دئییب بیر اوزون آهی ایلا داوام ائتدی:ساچیمی سوپورگه الدیم اما عؤمورم زای اولدوقیزیم زای اولدو. سونرا اوتری بیر باخیش اطرافا دولاندیری ، یاناقلاری ایسلانیب چیینلری

تیتره دی .

لیلا دیزلزین قوجاقلایب دووارا دایانیب

خاطیرلایردی کی اوچ ایل بوندان اؤنجه  قارداش آروادی ایکی طایفا آراسیندا اولان ایختیلاف اوسته  بوشاناندان سونرا قارداشی ایکی آیاغین بیر آیاق قابیا گئیدی کی گره ک

کندیمیزدن کؤچک، بوتون یئر یورد لارین،قویون قوزولارین هامپالیقین ساتیب سووب،آنا باجیسین،

بالاجاقیزین گؤتوروب آدی

باتمیش شَهَره گلدی بیر ائو شَهَرین آشاغالارین دا آلیب

فهله لیینن باشلارین ساخلاییردی کی بیر گون گئدیب داها ائوه قاییتدمادی ،سؤز سووو چوخ اولوب هر آغیزدان بیر صدا گلدی گونلر گئچیب آی یادؤندو. آمما قارداشینین نه اؤلوسی تاپیلدی نه اؤزوندن بیر خبر چیخدی.

بئش آی او حادثه دن سونرابیر آن اوسالیق دان  نازلی نی کوچه ده ماشین ووروب قاچدی

نازلی اوستوباشی توز توپراقلی

تیلیت قان ایچره  آناسینین الینده جان وئردی .اوزاماندان آناسی خسته اولوب هردن نازلی نی اوستو باشی توزلو حووضون قیراغیندا، کوچه ده گورور،هردن کندلرینده یاشایان زاماندا یاشاییب کؤچمه ک اوسته اوغلویلا سؤزله شیر…

او گوندن اله بیلکی ایلقیت اسن یئللر یاشام چارداغلارین ییخیبدیر.

قادین _  آی بالا هر سوموگوم بیر ساز چالیر دئیه دئیه قیچ لارین اوزالدیب بیر ایچیم سو ایسته دی

شوربانین سویو چکیبلیب کول اولموشدو لیلا توستودن بوغازی توتولوب اسکوروب اجاقی سؤندوروب پنجره نی آچدی،گؤزلری سریلدی کوچه نین اورتاسینا گؤردویون اینانمیردی حیط قاپیسین چالان قارداشیدی ،،

هؤیله سک قاپی یا ساری قاچدی… یوخودئیردى ،رویا دئیردى قاپینی قارداشینین اوزونه آچیب اوننان قول بویون اولدو ،،،اه قارداش یامان گونلر گئچدى هاردایدین ؟؟ کیشینین چیینلری تترییب دئدى باشیمین قضاسی چوخدو آنام هاردا ،نازلی،یا داریخمیشام باجی،

لیلانین گؤزلری دولوب دئدى قارداش گل ائوه نیسگیلیمیز چوخدو لیلا آناسینین باشی اوسته قاچدی قارداشینین قاییدماقین موشدولوغ

وئره اما هرنه سسله دی داش دان سس چیخدی آناسیندان یوخ، اله بیل بوتون یوخوسوز گئجه لرین چیلله سی گؤزلرینه دولموشدو…

 

بیر باخیش یاز

ایمئیل یایینلانمایاجاق لازم اولان خاللانمیشدیر *