او | علی احمد نژاد
او | علی احمد نژاد
آتامی اؤلدوردو. ایندی زورلاری چاتمادان تکجه آغلاییردیلار. آنام قورخوسوندان قارقیش دا ائله میردی، اوجادان آغلاییردی. اوزونو جیزیب باشینا تورپاق سوووروردو. هامی آغلاییردی، یئکه کیشیلر ده، خان عمیم ده. آتام هامیسی ایلا یولداش ایدی آمما او قورخاقلار تکجه آغلاماغی باشاریردیلار. هامی اوندان قورخوردو؛ آمما من آغلایا بیلمیردیم. دیشلریم بیر-بیرینه سیخیلمیش، قبریستانلیقدان چیخدیم.
آتام ناخوشلایاندا کندین قوجالاری عیادتینه گلمیشدیلر. هر بیری بیر جور اونو شوربالاییب، آجیغینا گلمه دییی بیر لحن ایله اونون الیندن چکدیکلریندن دانیشیردیلار. بیری تانرینین باشینا دولانیب دئدی بو ایل ده یاغیش یاغماییب، گؤیدن اوت تؤکولور، چؤلده سو تاپیلمیر. دئییردی هله بیز هئچ، او دیلسیز-آغیزسیز مال-داوارلارا دا رحمی گلمیر، قیشدا آجلاریندان قیریلاجاقلار. خان عمیم قویمادی اونا آجیق گئتسین. تئز دیل اوجو اونا شوکر ائله ییب صؤحبتی دییشدی. اونون خوشو گلیردی اونا قویون قوربان ائله سینلر. مالدان لاپ خوشو گلیردی. اونا گورا دا ایسته ییردی مال-داوارلاریمیزی قیرسین. اؤزلری ده بیلیردیلر بونو، آمما یئنه اوزونه گتیرمیردیلر. آتام دا قویونلاریمیزین ایکی سینی اونا قوربان ائله دی.
اونون هر نه ایله ایشی وار ایدی. آتامین لبه دارینی تاقچادان گؤتوروب باشیما قویسایدیم گؤزومو اویاردی؛ گئجه تئز یاتماسایدیم قارانلیقدا گلیب یئریمه ایلان سالاردی؛ آنام دئییردی نئچه اوشاغی یالنیز قونشونون تویوغونون یومورتاسینی گؤتوردوکلری اوچون کور ائله میشدی.
بیلیردیم منله ده دوز دئمیر. یئردن تاپدیغیم پولو اونون صاندیغینا آتماییب اؤزومه دوندورما آلاندان اوجور اولموشدو. بیر دوندورما اوسته منله لج دوشموشدو. توپلاریمین چوخو دروازه یه گیرمیردی. او قویموردو کی گیرسین؛ یا دیره یه دییردی یا اووت اولوردو. مکتبده وساییلیم ایتیردی؛ ایمتاحانلاردا دا جاوابلار یادیمدان چیخیردی. دوندورمانی ماهنا ائله میشدی، یوخسا ایمتاحاندان قاباق اؤز دوندورما پولومو صاندیغینا آتدیم آمما یئنه جاوابلار یادیمدا قالمادی.
اوره ییندن چیخمیردی. آنامدان زورایلا پول آلیب یئنه صاندیغینا دوندورما پولو آتدیم؛ اوچ دفعه ده باغیشلا دئدیم. آیدینین تزه میدادینین اوجونو سیندیرماغیما گؤره بلله مین یاریسینی وئریب بیردنه باغیشلا دئدیم؛ باغیشلادی. او آیدیندان دا پیس کوسه ین ایدی. حیطیمیزده نه قدر گول وار ایدی دریب اونون دووارینا سانجدیم آمما اونون اوره یی داش ایدی. مندن آجیغی گلیردی. آتامین ساغلیغینا نه قدر یالواردیم کارینا آلمادی؛ هئچ نازلی نین دا سؤزونه قولاق آسمادی. یاشار گیلین قوهوملاری ایدی. شهردن قوناق گلمیشدیلر. حیطیمیزدن بیردنه گول دریب آپاردیم. هم آدینی دئدی هم ده منله دوست اولدو. آدی نازلی ایدی. ساچلاری چوخ اوزون ایدی. آناسی ایکی دسته سینی هؤرموشدو. قاچاندا گؤیده توولانیردیلار. پالتارلارینی آختارسایدین بیر دنه ده لکه تاپیلمازدی. همشه گولوردو.
ائوچیی-ائوچیی اوینایاندا من ائوینه گئتسه یدیم هر نمنه پیشیریب وئریردی. عجاییب آدلار قویوردو پیشیردیکلرینه؛ منده هامیسینی دوزدن یئییردیم. ایستیردیم گولسون. یئیندن سونرا دئییردیم بیرینی ده وئر؛ گولوردو. دئییردی دلیسن. بیر دفعه گیردکانین یارپاغینی ازیب ایچینه سو تؤکموشدو. دئییردی آدی نم نمنه دیر. دئییردی دوغوردان او آدلا بیر یئیینتی واردیر. هامیسینی یئدیم آمما گئجه سی قارینیمی آغریتدی. من یارپاقلاری شیرین-شیرین یئینده گولمکدن دانیشا بیلمیردی.
توپ اوینایاندا همشه یاشارلا اولوردو. قویموردو هئچکس دیقاللیق ائله سین. منده سؤزونه قولاق آسیردیم. لاپ یاشار دا دیقاللیق ائله سه ایدی دیقالینی توتوردو. یامان دا قویموردو بیری دئسین. دئییردی تانری یامان دئینلردن خوشو گلمیر. دئییردی بیلیر تانری نین نمنه لردن خوشو گلیر. دئدیم کی او مندن کوسوب. دئدی دئسن باغیشلا دوست اولار. دئدیم اوچ دفعه دئمیشم. دئدی اوندا یقین دوست اولوب. هئچ اودا اونو تانیمیردی.
بیر دفعه گتیردیم ائویمیزه. آتامی گؤردو. دئدی تانریدان ایسته رم توختاسین. نازلی مندن نه ایش ایسته سه یدی گؤرردیم. آمما او نازلی نین دا سؤزونه باخمادی. او هئچ کسین سؤزونه قولاق آسمیردی. بیزی او یاراتمیشدی دئیه هر نه اؤزونون گؤیلو ایسته سه یدی بیزله گؤروردو.
اوزاق کندلرده بیر اوغلان آناسینا یالان دئمیشدی، ائولرینی سؤکوب اؤزلرینی ده دیری-دیری باسدیرمیشدی. دئییردیلر بیر یئرده ده چؤرک یئیندن سونرا شوکر ائله مه دیکلرینه گوره بوتون کندی، آداملاری قاریشیق سئل ایله آپارمیشدی. بیلیردیم بیزی ده ایسته ییر آجیمیزدان قیرسین. هامی گرک اونا باش اییردی، چونکو زورلو ایدی. اونون سؤزونه باخماسایدیق هامیمیزی یاندیریب اوتا چکردی. دئییردیلر بیر درین یئکه کوره قاییریب، ایستیسی داشی دا اریدر، بیریندن خوشو گلمه سه زورلا آپاریب سالیر اورا؛ داها دا قویمور چیخسین، بوتون عؤمرونو بیر یوللوق اوردا قالمالی دیر. بیر باغ دا جورلامیشدی، هر مئیوه دن ده اکیب بئجرتمیشدی. اورانین ایچینه تکجه اؤزونون خوشو گلنلری یول وئریردی. قاباق کندیمیزده باغ چوخ ایمیش، هر آغاجدان دا اکیب بئجرتمیشدیلر. او خایینلیغیندان سویوموزو قوروتدو، بلکه ده بیزیم سویو دا آپاریب اؤز باغینا وورموشدو.
قبریستانداکی قورخاقلارین آغلاماق سسلریندن قورتارماق اوچون یولدان چکیلیب داشلیغا کئچمیشدیم. گونش زور دئییردی، باشیمی قالخیزماغا قویموردو، قول قیچیما دا تیکان باتیردی. دؤزه بیلمه ییب هم تیکانلارین هم ده گونشین آناسینی سؤیدوم. قبریستانداکی لار سسیمی ائشیدیب دالیمجا گله جکلر دئیه قاچدیم. باشماغیمین هر طرفیندن آیاغیما تیکان باتیردی آنجاق یولا چاتانا کیمی دایانمادیم. دالیمجا گلسه یدیلر منی تاپاردیلار. گلدیییم یول بوتون توز اولموشدو. باشماغیمین تیکانلارین آریدلاجاق ایاغا دوردوم. آتام ساغ اولاندا چؤله گئدیردی. بیر دفعه بیرینی گؤرموشدو کی سوسوندان ییخیلیب اؤلورموش. ائویمیزه گتیرمیشدی. یازیق کیشی دانیشا دا بیلمیردی. آتام اونا قاشیقلا آش وئریردی. اؤزگه ایدی. دئییردیلر تانری نین بنده سی دیر. بیلدیم اونون ایشیدیر. ایسته ییردی بنده سینی سوسوندان اؤلدورسون؛ آتام قویمامیشدی.
آغزیم توز ایلا دولموشدو آمما کاریما آلمیردیم. توپورسه یدیم بدنیمین سویو آزالاردی. بلکه ده سوسومدان اؤلردیم. قویمادیم منی ده سوسومدان اؤلدوره. تپه نی قاچسایدیم اوردان اویانا داها کؤلگه ایدی. بوتون گوجومله بیرده قاچدیم. قبریستانلیق تپه نین دالیندا ایدی. تپه نی آشجاق داها بوتون ائولری گؤروردوم. آلچاق پالچیق ائولرین آراسیندان پارلاق میناره یئنه گؤزلریمی قاماشدیردی. آنام بوتون قیزیللارینی ساتدی. پولوایلا اونون ائوینه بیر تزه قیرمیزی فرش، بیرده بیر قیزیل میناره آلدی. آمما او آتاما ساغلیق وئرمه دی. آتام قویماز ایدی بیز آجیمیزدان قیریلاق. هاردان اولسایدی بیزه چؤرک گتیرردی. لاپ گؤرسه یدی آرتیق چؤرک تاپیلمیر، بیزی بیر آیری یئره آپاراردی. او بونو بیلیردی، اصلینده آتامی اونا گؤره اؤلدوردو. جیبلریمی داشلا دولدوروب نئچه سینی ده الیمده برک توتدوم. قیچلاریما بیرده زور ائله ییب یئکه آتدیملاریمی باشدان توتدوم.
هئچکس یوخ ایدی. اولسایدی دا قاباغیمی آلا بیلمزدی. ایسته سه یدی منی توتسون باشینی داشلایاردیم. قاپوموز آچیق قالمیشدی. حیط دن سو ایچیب آتامین آغاجینی دا گؤتوردوم. قاچا-قاچا ائوینین قاباغینا یئتیشدیم، قاپوسو باغلی ایدی. اوجادان آدینی سسله ییب میناره سینه داش آتدیم. داشیم چاتمادی. پنجره لرینی داشلادیم. گؤزومو اویسایدی دا آغاجلا قاپوسونو قیراجاقدیم.
هئچ ایش گؤرمه دی. بیر-بیر بوتون شوشه لرینی سیندیریب دال قاپوسونا یئتیشدیم. قاپو آچیق ایدی، اوردا همشه اولان کؤهنه قارا باشماقلار دا یوخ ایدی. قورخوسوندان دال قاپودان قاچمیشدی. مندن قورخموشدو.