قفیل نذیر – پروین قاسمی کؤجنه
قفیل نذیر
پروین قاسمی کؤجنه
سحرین ایشیغی آددیمین ایوانا باسمامیش، من قاباقلاییب ایوانا ساری آیاغیمی گؤتورورم. هؤوله‌سک قاچیرام .آی اللاه… آی امام حسین… آی حضرت علی اکبر… آی خانیم زئیناب… و قالان امام پیغمبرین آدی دیلیمه گلینجَک، تؤوله‌یه یئتیشیرم، قاپینی آچیرام و بیر آددیم ایچری‌یه آتاندا، اوره‌ییم بیرآز یئرینه ساری قاییدیر. قاییدیب پیلله‌ده اوتوروب، خانیم زئینابین اَته‌ییندن پاپیشیرام. امام حسینی دردیمه حکیم چاغیریرام. سو جوشدوقجا سماور جانین قویماغا یئر تاپمیر و بو سس، صبحانه یئمکی فیکریمه اوتوردور. گون یاواش‌ـ یاواش ائیوانا بویلانیر، گؤزونون آلتیندا یاییلیب سوفرانی دیوارین دیبیندن قاباغیما سورویورم . مَشه میظفرین گلیب نه دئیه‌جه‌یی انگیمی کیلدله‌ییب بوغازیمین یولون فراتین یولو سایاق باغلاییر. دئسه داها اَلینی اوز ناغایراجام؟ جانیمی هارا قالدیریب قویاجام؟ هانسی تندیرین کولون باشیما اَله‌یه‌جم؟ داها نه تَهر بیر دامازلیق اَلیمه سالاجام؟ مینلرجه فیکیر بئینیمه دولدوقجا آز قالیر بئینیمین قاپاغی توللانسین. بو کوجَنه کندینده نه گؤره‌جکلی گونلریم واریمیش.
ـ اؤهؤو… اؤهؤو -اؤهؤو، یااللاه… سالام زئیناب باجی، سحرین خیر انشا..
ـ سالام مشه میظفر قارداش، هر واختین خیر، خوش گؤردوک، بویوروز ایچری.
ـ ساغول باجی، گئجه باجیلیغین دئدی: زئیناب تاپشیریب قویونا بیر باخاسان. گون کؤزَرجک یولو اَلیمه آلدیم.
ـ هه آللاه سنی بو کنده چوخ گؤرمسین قارداش.
ـ باجی قویون تؤوله‌ده؟ ـ
ـ بلی
ـ یاخشی بیر باش چکیم گؤروم نئجه‌دیر
قویونو سورویوب چؤله گتیردی. ـ زئیناب باجی او حکیم باخاندا نه دئدی؟
ـ بیر ایینه ووردو. دئدی: اوچ گونه گؤی‌ـ گؤیرتی یئمه‌سه باشین کسدیر گؤزله موندار اولماسین، حاییف‌دی.
ـ آها… یئمیرکی هه؟
ـ یوخ یئمیر
ـ یاخشی اوندا داها اَلی اَل اوسته قویمایاق. قصّاب ولی‌یه وئرک کسیب ساتسین.
ـ مشهد میظفر پولو نجور اولاجاق؟
ـ باجی داها سن دئین پول اولمایاجاق کی، اوستونه خسته‌لیک آدی قویولدو داها چوخ یئره دوشَجک.
ـ قارداش اؤزون بیلیرسن بئش جوت قویونومو اوغورلادیلار. تکجه بو کالبای محمدگیلین سوروسویله قاریشیق گئتدی‌یینه منه قالیب. من ده بونو دامازلیق ساخلاییردیم، آرتیرام اونودا شانسیمدان بئله اولدو. یالقیز بیر قادینام. گؤزومو بونا تیکمیشم باجاردیقجا بیراز یوخاری سات یئرینه بیر دامازلیق آلاق.
ـ آللاها توکّل دا گؤرَک نجور اولور.
ـ گئدیم قصّابا ساری دانیشیم گلیم.
ـ چوخ ساغول قارداش سیزی ده زحمته سالدیم.
ـ بو نه سؤزدو باجی وظیفه‌میزدی.
مشه میظفر گئدن ندن سونرا، یئری گؤیو اَلیمه آلیب، تئزتوو سوپورگنین دیشیندن کئچیردیرم. دئییرم بیردن مشتری زاد گتیرر ائوه کئچیب بیر چای ایچرلر. داها قارنیمین قورولتوسو باشیما دوشور. اَل جک، کؤکه‌دن کسیب، بیر بادیمجان پیلله‌نین آلتینداکی کولدان دریب، قارنین یاریب ناهار یئرینه یئییرم، قونشو قیزبسی گؤرورم کی بیزه ساری گلیر. او یئتیشینجک چایی دمله‌ییرم.
ـ سالام زئیناب. گون اورتان خیر
ـ سالام قی بس هر واختین خیرانشا..، کئچ گؤره ک باجی تزه چای دمله‌میشم
ـ یوخ قادان آلیم ایچمه‌ییم یوخدور .گلدیم گؤرم قویونون نئجه دیر؟
ـ واللاه نه دئییم آغزین موملاییب کی موملاییب. هئچ ائله بیل او داش قومو اَریدن قویون دئییل.
ـ آللاه و اکبر. نه بیلیم واللاه،آدام شاشیب قالیر گؤیدن نه درد یاغسا، یئری بیزیم باشیمیزدی. آمما یئنه اؤزونو اوزمه آللاهدان نه قیسمت دی او اولاجاق.
ـ هه به … آللاهین دا باشینا دؤنوم. گرک ائله منی قویا قاباغینا؟ هارا خوشو گلسه فیرلادا. هانسی اؤیون، هانسی شبئه قالمادی باشیما گتیرمه‌یه؟ سانکی تکجه منی سینیق ساز یئرینه، سیزیلدماغا یارادیب. اونو ـ بونو بیلمیرم آللاه آدامین عؤمروندن، گونوندن کسیب، تکجه شانسینا ییخا. داها کافیره ده قیمیرام منیم گونومو کئچیرده.کیمسه سیزلیییم سایی، دردلر ساغ سالومو ترکینه آلیب.
ـ هئئی …بئناوا باجی داها نئیله‌مک؟دور گئدک بیزیم قاپیدا اوتور، من ده او بیر تالا یئرین آلاغین ائله‌ییم.
ـ یوخ قاداسی مشه میظفر ایندی هه دن یوخدان، بیر خبرله گله‌جک.
ـ آها… انشا. .خیرله گلر. آخشام اوستو گل باهم گئدک شاخسئی‌یه باخاق. تاسوعادی بوگون هر یئردن کنده گله‌جکلر.
ـ اولسون گئدریک.
قیزبسی اؤتوروب اؤزومو ائیوانا سریرم .دیل ـ دوداغیمین فیکیردن، سویو چکیلیب، چارتلاییب شورانلیغا بنزه‌ییر. قادیریم اولمور بیر چای تؤکوب آغزیمی یاخالایام. اوز توتوب آللاها یالواریرام کی، بو تاسوعای حسینه خاطیر، جمعی موشککولده قالانلارین موشککولون آچسین. امام حسینه، حضرت ابوالفضله، دخیل دوشورم کی، بو دامازلیق اَلیمدن چیخماسین. باشیم ائله قاریشیرکی، ناهار نامازیم یادا دوشمور. دستماز آلیب نامازا دورورام، مشه میظفرین یاآللاه سسی، اوتاغی آغزینا آلیر .آللاه و اکبر دئمکله، ناماز اوسته اولدوغومو بیلدیریرم.
نامازی قیرغی کیمی اوخویوب، فانارکیمی اَییلیب ـ دوزه‌لیب قورتاریرام.
ـ سالام قارداش نه خبر؟
ـ سالام باجی، قصّاب ولی دئدی: یاری قیمت گؤتورورم.
ـ یاری قیمت؟؟ نه آشاغی.
ـ هه هله ائشیتدیردیم کی حکیم دئییب: بو خسته دئییل، تکجه بوغازین شوشه درین بیچیب. دئدی: داها منلیک دئییل، خسته‌لیک آدیینی اؤزویله داشیییر.
ـ اولسون نئیله‌مک چاره یوخوم. بوگون عزیز گون، تاسوعادی. سحر عاشورانی ده گودوم سونرا گلیب قصّابا آپارارسان .
ـ اولدو باجی، اوندا من مچید قاباغینا گئدیرم.
ـ چوخ ساغول قارداش التماس دوعا..
ـ محتاج دوعا باجی
ـ موحتاج دوعا.
ـ تئز استیکانلاری یاخالاییب، قاپیـ باجانی باسدیریب، چرشابیمی اَلیمه آلیب، قیزبس‌گیله ساری یولا دوزَلیرم. قیزبس پنجره‌دن منی گؤرور و اَل ائله‌ییر گلیرم. ایکیمز قوشالاشیب،یولون ائنینی ده گئدیریک، بویون دا. قو وورسان، قولاق توتولار. بیر جیننی بشر یولدا یوخدور. هامی بوتون شاخسئی‌یه داشلانیبلار. اوزاقدان شاخسئی گئدنلر و تاماشایا توپلانانلار گؤزومه دَیجک، اورکدن سسله‌ییرم، یا حسین… عالم‌لر سنه قوربان… یا ابوالفضل… دونیالار سیزه قوربان… جان ـ جان سیزه جان. نه اولار؟ هامینین دردینه درمان یئتیریز، من ده اونلارین ایچینده. ایکی آددیم قالان،کالبای صفییه سسلنیر:
ـ قیز گلدین؟ لعنت یئزیده، آللاه اجر وئرسین. هله بایاقدان هر یئری گؤزومدن کئچیردیرم، سنی تاپام. قویونون نجور اولدو قیز؟ آماندی ها خبرین اولماز موندار اولار.
جاوابین وئرینجک دالدان گؤیچک خالا دئییر: ـ بابا باشین کسدیر راحات اول.
زولیخا بؤیوردن یاشماغین آچیب دئییر: ـ بیر قویون ندیر آخی اوندان ساری بیر کنده جوغا سالیبسان. و…
هره آغزیندان اؤز کئفی اوسته بیر سؤز بوراخیر.
ـ شاخسئی… واخسئی… شاخسئی … واخسئی…، اکبر اؤلوب… اصغر اؤلوب… اکبر اؤلوب… اصغر اؤلوب …حسن وای ….حسین وای….- و بو سسلر گؤزومو شاخسئی‌چیلره دولاندیریر. اوره‌ییمه ائله قیزیشما گلیرکی، هر نه دوشسه، دمیر پول کیمی قیزاریب چیخار. اَللریمی آچیب، اورَکلنیرم یا خانیم زئیناب … یالقیز جانینا یالقیز جانیم قوربان.آی امام حسین، باشی‌نین یاراسینا اوره‌ییمین حئسابا کیتابا گلمه‌ین یارالاری قوربان. آی حضرت ابوالفضل، کسیلن قوللارینا هر یئردن اوزولن اَللریم قوربان. سیزی آند وئریرم چکدیییز مصیبتلره خاطیر، هامیلا باهم منی ده مصیبت دن قورتاریز. هر آغیزدان بیر آواز گلیر .کیم نه بیلر اوره‌ییم ده نه تویودور؟ کیم نه بیلیر بو قویون قالسا چؤرک آغاجیم اولاجاق، هردن اَلیم دارا دوشنده بیر قوزو ساتیب، اؤز اَلیم، اؤز عملیم کئچینه‌جم. هره گیریب اؤز قینینا کیمین کیمدن خبری وار؟ سیتقاییب، آغلاییب ائله یالواریرام کی، نظریمه شاخسئی تئز قورتاریر و مچیدین خوددامی دوعا ائدیر. هر دوعا آراسی ایچیمده دئییرم قویونلاریمی اوغورلاییب، منی بوگونه سالانین، قوللاری یانینا دوشسون. و … سسیم هامیدان یوخاری قالخیر آمین… دوعادان سونرا هره بیر یئردن ائوینه ساری قاییدیر. من ده قیزبس‌له یئنی‌دن باش‌ـ باشا وئریب، قاییدیریق. قیزبس دئییر:
ـ گئجه مچید واختی چاغیرها.
ـ باشیم آغریییر سن گئدرسن التماس دوعا…دئییب: ائویمه ساری گلیرم. تؤوله‌نین قاپیسین آچیب، قویونا باخیرام. ماتی معطل، هر یئره کره‌لیر. اوتو، سویو نه تهر قویموشدوم، او جور قالیب. اَلیمی باشینا چکیب، آللاه سنه بو عزای حسینه خاطیر شفا وئرسین دئییب، ائوه گلیرم. اؤزومو او قدَر یئییب تؤکموشم کی، شاما، زادا گؤیلوم یوخدور. ایکی شَکر چؤره‌یی شاخسئی ده پایلاناندا گؤتورموشدوم اونو آغزیما آلیب، دستمازیمی تزه‌له‌ییب، تسبئحی گؤتورورم. آذانی گوده ـ گوده باشیمی یئره آتیرام. آذانا کیمی بیر نئچه صالاوات چئویره‌مک قرارینا گلیرم، ـ مییو…مییییی…میییوو. قونشو پیشی‌یی نین مه‌ییلتی‌سینه، گؤزومو آچیرام. واااای دده…. سحر اولوب.گئجه نامازی قیلمامیش، یوخو منی آپاریب. دوروب تؤوله‌یه ساری، سو کیمی سیچیراییرام. «یوخ هله دیریدی، شوکور اللاه» دئییرم. اَل ـ اوزومه، سو چیرپیب، بیر قاشیق چای، بیر تیکه چؤره‌ک یئییب، شبئهه باخما حاضیرلاشیرام. قیزبس ده فیکریم قالیرکی، منی نییه شبئهه چاغیرماییب. ایندی شبئهه‌ین چوخو اوخونوب. تئز اَل ائله‌ییب، قارا پالتاریمی گئیینیب، اؤزومو یولا سالیرام. یولون یاریسندا اؤز ـ اؤزومه دئییرم: قویونودا آپاریم بیر دوعا ائله‌تدیریم. بیر ده دئییرم :کندین هامیسی شبئهی اؤتوروب، منی شبئهه سالیب ،گولوب، دئیرلر:
ـ خالق نذیر باغلاییب، خسته گتیرنده، بودا حئیوانی قاتیب قاباغینا اوتانماییب گتیریب. آمما بیردن جین باشیما وورور. قاییدیب قویونو قاباغیما قاتیب، دئییرم جره جهننم. گولن گولسون. لاغا قویان قویسون. هره‌نین بیر دردی وار. منیم ده دردیم ایندی بودو. یولون یاریسیندا، قویون گؤتورولور. ها قاچیرام توتا بیلمیرم. نَفَسیمی درمَک اوچون بیراز یاواشیییب، بیرده یولا آیاق گؤتورورم.
ظریفه‌نین اوغلو، اوشاق قوجاغیندا ائوینه قاییدیر. سورورام بالا منیم قویونومو گؤرمه‌دین؟ اَلیمدن قاچدی.دئییر:
ـ زئیناب خالا شبئه چیخان یئره ساری بیر حئیوان قاچیردی.
ـ آددیملاریمی بیراز یئکه‌لدیدم. تئز شبئه چیخان یئره یئتیشیرم. گؤرورم حضرت ابوالفضل شبئهه‌ین قاباغیندا، قویونومون باشی کسیلیب، و او دؤوره ده اولانلار، اوستو باشلارین قاندان قورویاـ قورویا، آللاه قبول ائله‌سین دئییرلر. آغاج کیمی قورویوب قالیرام. دیلیم دایانیر و هئچ بیر سؤزو توتا بیلمیر. قونشولاردان بیر نئچه‌سی دئییر:
ـ نه اولدو زئیناب باجی؟
اختیارسیز یئره دوشوب، یئری قوجاقلاییرام. گؤزوم هر یئره تور چکیر. ائشیدیرم مشه میظفر دئییر:
ـ بو زئیناب باجینین قویونودور. اؤزو یوللاییب؟حاجی نیظام دئییر: ـ هانسی زئیناب؟ بو قویونو خانکندیندن سیفاریش ائله‌میشم گلیب.
ـ یوخ بابا بو زئیناب باجینیندی.
ـ بئله ایش اولماز قارداش. دایان گؤروم، آیه به‌دواللاه…
ـ بلی حاجی. حاجی من ده سنی بایاقدان گزیرم. سیفاریش ائله‌دیین آدام دئدی: گل اؤزون قویونا باخ سئچ آپار.
ـ آیه ظالیم اوغلو من سنی گؤرجک، دئدیم بس قویونو سن ایچری اؤتوردون، منده توتوب باشینی کسدیم. ایشیمه باخ بیر سن آللاه. اولسون… داها ایش ایشدن کئچیب. او سیفاریش اولان یئره، زئیناب باجینی آپار، یاخشی سینین بیرین اؤز قویونو یئرینه سئچسین.