بارانتای- سحرخیاوی
بارانتای
سحرخیاوی
دوربینین باغی چیینونده رد سالیب یتیشیرسن ایکی یول آیریجینا دورووه گؤز گئزدیریرسن نئچه گون بوندان قاباق، بوردا ایت ییئه‌سینی تانیمیردی، دوشمان قاچا ـ قاچدی دیر اؤلو دیریه، دالا قئیدن؛ اونلارین یئرین دولدورانلار توپ، توفنگه قاتیشمیشدیر! آمما بوآرا هئچ نه اوشاقلارین شنلیگینه چاتمازدیر! بیر ایلدن سونرا شهر دوشمانین الیندن آلینیب؛ صدامین بورنو یئره سورتولموشدور! دئمک اولار سن ده؛ قصدن قیدیشووی دالا آتیب بیرده بورا گلیبسن. یادووا دوشور بونئچه واقتدا ماجالون اولمیب بیر شکیل سالاسان هئچ اولماسا… دالا باخیرسان؛ گؤردوگووه اینانمیرسان بیرنفر دیزی اوسته، الی دالیندا طاقتا پارا تئبلووا سؤکنیب ائله بیل سنه باخیر! فیکیرلشمیرسن توفنگی وار یایوخ! اوزووی یئره آتیب دؤرت گؤز اونا گؤز تیکیرسن دوربینووی بوینووا آسیب اسلحه‌وی ضامیندن چیخاردیرسان! اوره‌گوندن کئچیر:
ـ منیم کی دالیم اونیدی؛ نییه ویرمئیب؟
ایمک‌لییه ـ ایمک‌لییه اونا یاخینلاشرسان دوشمانین پالتاری اینینده دی. گؤزلرینی بیر تانینماز یولا زیللیب! بلکه ده شهره گئدن میننن، سیم خاردارینان دولی چکدیک لری یولا باخیر اوجادان دئییرسن:
ـ اللئرووی آپار یوخاری؛…
جاواب وئرمیر هئچ؛ یئریندن ده دئبرمیر! اوره‌کله‌نیب بیر آزدا ایره‌لی گئدیرسن. اونون اللرین بیلنگیدن تلفون سیمیلن دالدا باغلیبلار ایاقلارینین آلتیندان قان قئنو سایاغی یول سالیب آخیر قوللارون سوسلانیب اسلحون یئره دوشور دیقت‌له اونا باخیرسان سن بویدا آنجاق اولا! بیلمیرسن نییه گؤیلون ایسدئییر اوندان بیر شکیل سالاسان بلا‌خره دوربینوون قابین دوشمانین الی باغلی، اؤلی سربازی دولدورور اونون اوجور اولدوغونه شک ائلیرسن:
ـ اؤز اوشاقلاریمیزین ایشی اولا بیلمز!
اوزاقلاردان خمپاره‌لرین توپونون سسی، ایتلرین هورمگی چورتووی پوزور بیلیرسن گئجییه دوشسه اونون اؤلوسوندن بیر تیکه ده قالمیاجاق، اوشونورسن بیر ایاقون قاچاقدا گوزلرینه باخیب دئیرسن:
ـ آللاه حققی بیردنه بئل اولسایدی سنی باسدیراردیم!
یولا دوشورسن؛ توپلار په‌دَرمه دوشوب پارتلیرلار؛ اولما دوشمان ایسدیر بورانی تئزه دن آلیب اؤز یئرلرینه قاتسین آجی گولومسَییب دئیرسن:
ـ او بوپبودی یایدا گئلر!
یولی توتوب گئدیرسن؛ اوردا قالماقون صلاح دئور هئچ یوزمتر سووشمیب‌سان گؤزون بیر یاریمچیلیق سنگره ساتاشیر بیر بئلده یانیندا تورپاقا قویلانیب آندوننان کچنمیب بئلی گؤتوروب قئیدیرسن دوز ایاقینین آلتینی باشلیب قازیرسان آللاه ـ آللاه ائلیرسن قبیر قیبلییه اولا سربازین قانی قبیره یول سالیر هئچ یوخودا گؤرمزدون بیرینه قبیر قازاسان! بیردن خمپاره توپونون بیری یوخونلوغوزدا پارتلیر، توز توپراق گؤوه گئدیر موجی سنی قبرین یئرینه یاییر ائله سربازی دا سنون اوستووه توللیر قورخودان دیل‌ـ آغزون توتولور آمما اوزووی ایتیرمیب آلتیندان چیخیرسان گئنده دوروب تعجب‌له اونا باخیرسان توپون ترکش‌لری جانینا تئزه یارا سالیب اوره ون اونا یانیر دئمک کی اوسنینن اؤلوم آرا دووار اولوب او اولماسیدی ایندی قازدوغون قبیر اوزوون گُورون اولا جاقیدیر! یئنی دن قبیره دوشوب اونی بورره‌مه اوزادیرسان، قیچلاری قورویوب آچیلمیر، اَینینده کی پنجئگین چیخاردیب؛ اوزون، باشین! اونا بوکورسن آغزی آچیلیب دیش‌لرینین آراسیندا دؤرت دنه فیشنگین بوش پوکه‌سینی گؤرورسن اونلار اوردا اولدوغونی هوش ائله‌میرسن جیبیندن کارتین گؤتوروب آدینی اوخویورسان:
ـ سعد عبدالجبار… سعد عبدالجبار!
قالان یازیلاردان باش تاپمیرسان. قبیردن چیخیب، باشلیرسان اوستونه توپراق توکمگه اونا رحمون گلیر، غریب مملکتده، طایفاسیندان اوزاق! شکّیلی اؤلوم! یانی اونا هئچ کیمسه فاتحه اوخومویاجاق؟ الوندن اونی باسدیرماقدان سونرا بیرایش گلمیر اونی آرالیق ایتلرین الیندن قورتاریرسان چوخدور! قان لَکه‌لی تاختانی قبیره چالیب سرعتله قاچیرسان.
***
اون بیرایل سوشور! دالوجان گئلنلرین ماشینینا مینیب گئدیرسن ایستمیرسن بیریسینه شوغلوزومبه قالاسان دئیرلر! جنازه وئریب شهید آلوروق اولسا جوت ـ جوت! اؤنملی بیر آدام اولاندا؛ نئچه شهیدیلن دَییشیللر!! سن گؤرستدیگین؛ سرهنگ، سلطان دئور دوشمانین تکجه قولی باغلی اولی سربازیدیر آدی سعد! ساجدیغون طاقتا تابلو بیرده ایکی یول آیریجی بیلدیگون نیشانلاردی ایکی دئور فیرلانیب اورانی تاپیرسوز، نئچه ایلدن سونرا یئل توپراقلاری قاریشدیریب، یاغیشلاردا برکیدیب اورانی گورست‌جگین، سندن گلنلر آمان وئرمیب، سعدی یئرین آلتیندان چیخاردیللار نئچه تیکه سوموک دور و داها هئچ! پئنجک پولوکلنیب؛ باش طرفینی آچارکن دؤرد دئنه پاسلی پوکه‌نی گؤروب بیرـ بیرینه معنالی باخیرلار. یول اوزونو اونو نه‌جور گؤردوگونو اونلارا سولمیشدون سوروشورسان
ـ قضیّه نه‌دی!؟
ـ جنگدن قاچانلارین بیریدی؛ اوزلری اؤلدوروبلر!
ـ نئجور؟!
هئچ بیری جاوابینی وئرمیر، گئنده دوروب فیکیره گئدیرسن، ایستمیرسن اوزونن، سعدین باشینا گلنی کاغاذا یازیب اونون سوموک لرینین یانینا قویوب گؤندرسن. اون بیرایلدن سونرا بو سیری ائشیدیب اونون محبتی برک اوره‌گووه دوشوب! اوخدوغون فاتحه‌لری اونا حلال اولسون دئیرسن: سعد! داریخما؛ گئدیرسن ائووزه! سنده ائله بیرنفر شهیدینن بارانتای گلرسن!
پرده سیز پنجره‌میزدن گونون ایشیق و ایستی‌سی اوزومه توشدو. قاریشقا بدنده یئریین کیمی چیلپاق بویون ـ بوغازیمی قیدیغلادی.اؤزون گونه وئرن بیر پیشیک کیمی آرخایین‌لیغیلا قوللاریمی اویان ـ بویانا وئریب گرنشدیم. یاتاغیمدا بیراز اویانا، بیراز بویانا قیوریلدیم. اریمین سؤزو یادیما دوشرکن اؤز ـ اؤزومه گولومسه‌دیم: «سحر» تا دؤرد چئوره‌نی طواف ائله‌مه‌ییب رضایت وئریب یئریندن دورماز.
بیراز تنبللیک له بالاخره یئریمدن دوردوم. ائوی دربه داغین گؤردیومده سانکی یئنه ایچیمده پالتار یودولار. تزه بو ائوه داشینمیشدیق. اریم بویلو اولدوغوما آغیر ایش گؤرمگیمه راضیلاشمیردی. امما منی ائوین بو دورومو داریخدیریردی. بو گون هر جور اولسایدی گرک یاواش‌ـ یاواش ییغ ییغیش ائلییه‌یدیم. اریم صبح دوروب معمول عادتینه منی اویاتماغا قییماییب چای قویوب صبحانه‌سینی یئییب اداره‌یه گئتمیشدی. من اوچون ده فلاکس دا چای ساخلامیشدی. بوکولو سوفرادا تزه سنگک، قیراغیندا موتال پنیر، قاینانمیش یومورتا، گیردکان ایچی و خورما منه گؤز ووروردو. اؤزومو ازدیررکن ائیوانا چیخدیم. تزه حیطیمیزده میوه آغاجلاری و گول بوتالاری سرین یئلده اسیردیلر. دریندن بیر نفس آلدیم. قارنیمدا اولان کؤرپه بالامین ترپشمه سی منه بو گوزل سحرده مضاعف سئوینج وئردی. الیمی نازلایاـ نازلایا قارنیمین اوستونه چکدیم.
بو حالدا دووار به دووار قونشوموزدا کی حیط‌دن بیر قادین سسین ائشیتیدیم: آی یئری گؤیو توکنمز قدرتیله یارادان تانری؛ شوکور هزاران شوکور سنه. منه ماجال وئردین بیرده اویاندیم. بو یئری بو گؤیو،آغاجلاری؛گؤزل گوللری، اوخویان قوشلاری؛ داغی، داشی بیر ده گؤردوم. شوکور، شوکور هزاران شوکور. وئردیگینه ده؛ آلدیغینادا شوکور. مصلحت سنین‌کی دیر.تسلیمم رضایتینه.
سسی آهیل قادین سسینه اوخشاییردی. حتا دیشی آغزیندا اولمادیغین دا سئزدیم. نه گؤزل دویغویلا تانریسیلا دانیشیردی. من تانرینی همشه یئرله گؤیجه اؤزومدن فاصیله‌لی و اوزاق گؤرموشم. بیر ال چاتماز مقدّس کی دونیانی یاراتسا دا اوگئی اوشاق کیمین باشینا بوراخیب. نه کئچیر یئرده وئجینه دئییل. من هئچ واخت بو قدَر صمیمی ایلگی اونلا قورا بیلمه‌میشم. بو قوجا قادین نه سایاق بئله بیر ایلگی قورا بیلمیشدی تانریسیلا؟ اونو یاخیندان گؤرمه‌لی و بو سورغونو اوندان سورمالیدیم. هاردان یاشامدان بو قدَر راضیلیغی گؤره‌سن اله گتیریب؟!
نئچه صبح دالبادال دا بو سس و شوکرانه‌لر قونشومدان تیکرار اولوندو. دؤزه بیلمه‌ییب بیر سحر صبحانه‌می یئیندن سونرا گیلاس آغاجیمیزین ال اتَییندن بیر سبد تزه گیلاس دریب دربنده چیخدیم. بو دربند بن‌بستیدی و یالنیز ایکی ائو بو قاپیسی اولان دربندده یاشاییردیلار. بیز و قونشوموز. ائولریمیزین نماسی و شکل شمایلی بیرـ بیرینه اوخشادیغی نیشان وئریردی بو بنالاری بیر نفر تیکدیریب سونرا آرا کسیب ایکی حیط ائله‌ییب ساتیب. سبد الیمده قاپی‌نین زنگین باسدیم. سوروشمامیشدان قاپینی آچدی. نه گؤروردوم ایلاهی آستانادان ائوه جه گول کیمین پاریلداییردی حیط‌ده. تزه سو وئریلمیش گول بوتالاری گونش آلتیندا سیریشیردیلر. باغچانین ایچینده بیر هئیوا و بیر گیلانار آغاجی دا گؤزه چارپیردی. حدسیم دوزویدو او قادین فیکر ائتدییمدن ده قوجایدی. یئتمیش بئشدن حتمن یوخاری اولاردی یاشی کی آز اولمازدی. محلی تومان کؤینک گئیمیشدی. پالتارلاری دا تمیزلیکدن اَینینده پاریلداییردی. منی گؤرجک آیاغا قالخدی. سلام وئریب شرمنده بویورما آنا جان دئییب الیندن اؤپدوم و دردیگیم گیلاس سبدین تقدیم ائتدیم.
بیزیم ائوه تای اونلاریندا بؤیوک ائیوانلاری واریدی. قادین ائیواندا بیر دؤشکچه اوسته اوتورموشدو. دالیندا دا نئچه بالاجا یاسدیقچا اوست‌ـ اوسته قویموشدو. منی قارشیندا اولان دؤشکچه‌نین اوستونده اوتورماغا دعوت ائله‌دی. اَیلَشدیم پاریلدایان استکان نعلبکی‌ده قاباغیما چای قویدو. توت قوروسو و قندله. هانسیلا مئیلین چکیر ایچ ننه قوربان دئدی. منیم قند مریضلیگیم اولدوغونا توت قوروسو ایچیرم. فیکریمجه بو دووار ـ دووار تزه قونشومسان سهو ائله‌مه‌سم.
-بلی دئدیم
-داریخیب ائله مه ها ننه قوربان گل گئت بیزه.بورا اؤز ائویندیر.اینشاللاه آرتیق تانیشاجاغیق
-چوخ یاشا عزیز آنام لوطفون وار البته اؤز ائویمدیر.آباد اولسون.
بیرازدا اویان ـ بویان قونشولاردان، محله‌دن زاددان منه تانیشلیق وئرندن سونرا دئدیم:آناجان من گئج یوخودان دورموشام. اوزوم آیاغین آلتیندا بو وضعیتیمه گؤره یوخوم چوخ اولور. اریم اداره‌دن گله‌جک، گرک بیراز ائو یئربه یئر ائله‌ییب ناهار پیشیرم. ایذین بویورسان گئدیم. امما گئتمه‌میشدن قاباق بیر سورغوم وار سیزدن؟
ـ بویور دئدی.
ـ سحرلر من بیر صمیمی سس ائشیدیرم تانریسیلا سانکی بیریاخین دوست کیمی دانیشیر. راز و نیاز ائله‌ییر. بو سسین صاحیبی سیزسیز؟
گولومسه‌یرک اؤزمم دئدی.
– بو رضایتی یاشامدان؛ تانریدان هاردان اله گتیریبسیزمی؟! من نه‌دن بئله اولا بیلمیرم؟!
درین بیر آه چکدی.گیله‌لرینده یاش دالغالاندی:
«اؤلوم ننه‌لریندی بالا اؤلوم ننه‌لریندی. اوزاق کئچمیشلرده دونیا پاییندان ائله بیر اوغلوم اولدو. آدین قویدوم یاشار. آتاسی‌نین عؤمرو کفاف وئرمه‌دی یاشاریمین آلتی یاشی اولارکن آزارلاییب دونیاسینی دَییشدی. من قالدیم یاشار و بیر دونیا تنهالیق. رحمتلیک شهرداری کارگریدی. حقوقو قالدی. جاوانلیغیمدان کئچیب منی یئنی‌دن ائولنمگه تشویق ائدنلره دئییردیم: گئتدیگیم بیری هله نه معلوم یاخشی اولا اولمایا. اؤزوده منه ده یاخشی ار اولسا یاشارا یاخشی دده اولماز. حقوقوم ائویم وار. ائویمینده کیشی سی یاشار. نه باشینی آغریدیم یاشاریمی بویا ـ باشا چاتدیردیم. چوخ هوشلوـ باشلی بالایدی. دوختورلوق اوخویوردی. هامی بختورلیک تاجی قویموشدو خاور ننه‌نین باشینا.امما فلک قویمادی. یاشاریم یاشامادی.
عزیزیم اسدی فلک
صبریمی کسدی فلک
هریئرده چادیر قوردوم
طنبین کسدی فلک
ماشین قضاسیندا دانشگاهدان گلنده بالام تبریز- اهر یولوندا اوچدو. الیم بوشدا قالدی.گولوم سولدو. ایراق یانارچیراغیم کئچدی….
آغلاماق توتدو.کلایاغی سینین اوجویلا گؤزلریندن آخان یاشلاری سیلدی.
منده توتولموشدوم.
– باغیشلا منی آناجان ناراحات ائله‌دیم سیزی.
-یوخ بالا سن باغیشلا. دردلی دئیینگن اولار دییه‌رلر. باشی بلالی جانیم سنه دئسین: یاشار عکاسیدی بالا. طبیعت دلیسی. بالامین اؤلوسییله عهد ائله‌دیم نه قدَر عؤمروم اولسا اونون دویونجا دونیانی گؤرمه‌میش گؤزلریله داغا، داشا، گوله، چمنه، قوشا، یاغیشا باخام. گؤزلریمده اونا شکیل چکم، او دونیایا آپارام. ایندیسه گؤزلریمده مین آلبوملوق شکیل وار بلکه. اونلاری اوغلوما پای آپاراجام. بیلیرم چوخ سئوینه‌جک و او شکیل‌لر نازلی گؤزلرینی اوخشایاجاق. بودو او شوکرانه‌لرین سیرری. من تانریمدان مهلت آلمیشام اوغلوما اؤزل آلبوملار ییغماغا. اؤلوم آنالاریندی بالا….اؤلوم آنالاریندی.
منی باغیشلا قیزیم بو دورومدا سنی غملی ائله‌دیم.
-سیز منی باغیشلایین.آجی خاطیره نیزی یادینیزا گتیردیم.
اوزگون حالدا قادینلا وداعلاشیب ائویمه قاییتدیم.
اؤلومو نئچه آی چوخ چکمه‌دی. تکجه من بیلدیم او انتظارلی گؤزلرینده اونلارجا آلبوم شکیل پای آپاردی گنج اوغلونا….