خسته‌لیک – سولماز محمدرضایی
خسته‌لیک
سولماز محمدرضایی
قارا چادراسی‌نین بیر اوجونو الینده مؤحکم سیخیب نه‌قدر سورتسه‌یدی‌ده کار وئرمیردی. اینجیک باخیشی ائله قبیره زیللنمیشدی سانکی “اللریمله ده سیلنمه‌سم گؤزلریمله سیله‌جه‌یم” دئییردی. من ایسه بالاجا قورآنی آچیب یاواش یاواش یاسین اوخویوردوم.
سرین یئل اسیردی. اوجا قلمه‌لردن ساللانان ساری یارپاقلار یئل دیدیکجه قوپاریلیب فیرلاناراق قبیرلرین اوستونه دوشوردولر. سونرا دا بیر مؤحکم یئل اسیب او قبیردن بو قبیره، بوتون قبیرلری گزه‌جکلر کیمی حرکت ائدیردیلر.
هاوا قارالمیشدی. آنام نه قدر چالیشدیسا قبیرین باش داشینداکی جیزیلمیش قیرمیزی اوره‌یی سیلنمه‌دی دئیه سینیرلنیب گئدک دئدی. بو اوره‌ک کیمین ایشی ایدیسه چوخ‌دا سلیقه ایله چکیلمیشدی
منجه هئچ‌ده اهانت دئییلدی. بلکه‌ده دده‌مین روحو داریخدیغیندان بیر رومانتیک ایش گؤروم دئیه او قیرمیزی اوره‌یی چیزمیشدی. آنجاق بو اوره‌ک منی ایچدن قورخودوردو.
همیشه اؤلودن قورخاردیم. ننه‌م اؤلنده ۹ یاشیم وار ایدی، کوچه‌ده قونشو قیزی ایله ائوجیک اویناییردیق. اییلمیش بیر قوجا آرواد بیزیم ائوه گئدیردی. آنام قارشیسینا گلدیکده بیزه باخیب “بو اوشاقلاری قویما گلسینلر” دئمیشدی. اوگونو ائویمیزه چوخ قوناق گلیردی. آتام دا بیزیم گئجه‌نین سون وقتلرینه‌جن کوچه‌ده اویناماغیمیزا هئچ دیللنمیردی.
گئجه یاتاندا کیچیک خالام بیزیمله بیرگه یاتاجاقدی. چیراقلاری سؤندوروب الیمی الینه آلارکن “قیزلار اصلن قورخمایین‌ها من فاتحه اوخویاجام سیز ده یوخولویونجا صالاوات چؤرون” دئدی. او گئجه ننه‌مین اؤلدویونو آنلامیشدیم. بیر دفعه دوستوم دئمیشدی بیری اؤلنده روحو بدنیندن چیخیب دیری‌لرین باشینی کسر. باشیمین کسیلمه قورخوسوندان ال‌لریمی باشیما قویوب صوبحه‌جن یاتانمادیم.
ننه‌مین اوچو ایدی. هامی قبیر اوستونه گلیب باش ساغلیغی وئرندن سونرا داغیلمیشدی. آناملا من ده یاواش یاواش ائوه دوغرو آددیملاییردیق. ننه‌م‌دن اؤنجه قبریستانا گلمه‌میشدیم دئیه چوخ عجیبه گلیردی منه. یاتاغا بنزر آغ-قارا داشلاردان دوزلمیش قبیرلرین هر بیری اوستونده بیر آد یازیلیب دئمک بیر اینسانی اونون آلتیندا قویلامیشدیلار. بو قدر اؤلونون روحو گئجه‌لر خورتلاییب هارا گئده‌جکلری قورخونج گؤرونوردو. بلکه ده بو داشلار روحلارین بوراخیلماسینی انگلله‌ییردی! نه‌بیلیم! من هئچ بیر قبیری آیاقلاییب روحونو اینجیتمه‌ییم دئیه اینجه‌اینجه آددیم آتارکن آنامین آردیجا گئدیردیم. آنامین دوداغی تئزتئز ترپنیردی، عادت اوزره قبریستانلیغی کئچیب بیتیرینجه فاتحه اوخویاردی.
ائوین قاپیسینا یئتیشدیکده باشماقلاریمی تله‌سیک چیخاریب قیرمیزی خالچالی قالدیریملاری ایکی اوچ آتیلیب ائوه گیردیم. ائوین او باشیندان بو باشینا و بو باشیندان او باشینا آددیملایان آتام منی گؤرجه‌یین “کؤپه‌یین قیزی جهنم اول گئت اوتاغا. بی‌ده حقون یوخدو چؤله چیخاسان” باغیردی. تعجوبله دووارا یاپیشاراق اوتاغا گیردیم. بیر نئچه دقیقه سونرا آتاملا آنامین سس‌لری اوجالدی. اوره‌ییم یئیین چیرپینیردی. آنامی دؤیوردو ائله‌بیل، “کیشی آللاهدان نییه قورخمورسان” دئییب آغلاییردی. ماویی گوللو بالینجی قوجاقلاییب آغلاییردیم.
آتام همیشه اوغولسوزلوغونا گؤره آنامی سوچلو بیلردی. آنام دا نظیرـنیاز قالمازدی ائدیب آللاهدان اوغول ایستردی.
او گون باجیملا قونشو اوغلانین قاچماق خبری محلله‌ده بمب کیمی پارتلامیشدی. اوغلان سرباز گئتمه‌دن اؤنجه آتاما باجیمی ایسته‌دییینی دئمیشدی. آتام دا سینیرله‌نیب بیر شیلله وورموشدو.
اوغلانین آتاسی نفتچی ایدی، یانی نفت ساتاردی. شهره گاز چکیلندن آرتیق نفت آلان یوخ ایدی اونا گؤره‌ده نفتچی کیشی نفت ساتانمیردی. آنام دئیردی عائیله‌سینی کئچیندیره‌نمیر! گون اوخولدان قاییدیرکن دوستوم ساریشین بیر اوغلانی گؤسته‌ریب سنین باجینی ایسته‌ین اوغلاندیر دئمیشدی. ایشیق دیره‌که دایانان آریق اوغلان، رنگی سولموش خلبانی کاپشئنی‌نین جئبیندن هئی دنه چیخاریب چیرتلاییردی. هردن ده بیر آخان بورنونو یوخاری چکیب گؤزلرینی بیزیم قاپییا زیلله‌میشدی.
ائله‌جه اومودسوز قاپیمیزا زیللنمه‌ییندن باجیمی نه‌قدر سئودییینی سئزیب اوغلاندان خوشلانمیشدیم. دوغروسو باجیم بیر اوغلانلا ائوله‌نیب ائولندییی آدام آتاما اوغول اولاجاغینا داها چوخ سئوینیردیم، نییه‌کی من آتاما اوغول گتیره‌نمه یه‌جکدیم، بو سؤزو ۷ یاشیما دولدوقدا بیرینجی گون اوخولدا اؤیرتمن‌لرین بیری دئمیشدی.
شنبه ایدی، باجیمین مانتوسونو گئییب اؤزومدن بؤیوک بیر چانتا چیینیمدن آساراق سیرانین باشیندا دورموشدوم. ایکی اؤیرتمن بؤیرومدن کئچرکن منه باخیب “بئناوا قیز نه‌ده چیرکیندی! یازیق ننه‌سی بونو اره وئره بیلمییه‌جی” دئییب گولوشدولر.
او زامان “چیرکین” سؤزجویونون آنلامینی بیلمیردیم دئیه چوخ دوشوندوم. سوندا چیرکینلیک بیر تورلو خسته‌لیک اولدوغونو آنلادیم. آنام هر کیم خسته‌لنسه‌یدی “بئناوا فیلانی خسته‌لنیب” دئییردی. بو “بئناوا” سؤزجویو هر نه‌یی منه آیدینلادیردی. او گوندن هر کیم آدیمی، حالیمی و یا درسیمی سوروشسایدی “من چوخ خسته‌یم” جاوابلاردیم. ائله بونا گؤره‌ده نئچه دؤنه آتام منی دوکتوره آپاریب نم نه‌قدر ایینه‌ـداوا یئمیشدیم، آما ندنسه خسته‌لیییم هئچ یاخشیلاشمیردی!
اینجه‌اینجه آنامین آردیجا قیرمیزی خالچالی پیلله‌لری یوخاری چیخیردیم. گیریش قاپی‌نین اؤنونده ایکی اؤزگه باشماق وار ایدی دئیه آنام یئیین گئدیب مندن اؤنجه ایچری قاپییا یئتیشمیشدی. گیره‌جکده باجیم باشینی آشاغی سالیب بؤیرونده دؤردـبئش یاشیندا بیر اوغلان ایله شمیشدی‌لر. باجیم آنامی گؤرجه‌یین دوروب اونو قوجاقلادی.
قاپی آستاناسیندا دوروب بیر فیلیم کیمی او دؤرد نفره باخیردیم. آنامین قارا چادراسی یئره سریمیشدی. گؤیرمیش گؤزلرینی الی‌ایله گیزله‌درک آنامین اؤنونده ایله‌شن باجیم، اوغلونا گؤره نئجه دؤیولوب ائودن دیشاری سالینماسینی تعریفله‌ییردی. آتام اوغلانی گؤرمه‌سین دئیه باشینی تلویزیونا دوغرو چئویریب هردن بیر گؤزلریندن یاش آخیردی. دووارداکی ساعات دورمادان ایشله‌ییردی. دئییلر اوغلان خسته‌دی.