پنجشنبه, اسفند ۳, ۱۴۰۲
اؤیکوامضا درگیسی

دایره – ربابه قلی زاده (سئودا)

دایره

ربابه قلی زاده (سئودا)

آنام منی حیرصله اوتوردوب دئدی: «حاققین یوخدور اوتاقدان ائشیگه چیخاسان» آنجاق بونادا اوره‌­یی دؤزمه‌­یب، قاییدیب گلدی هندوریمده بیر دایره چکدی: «حاققین یوخدور بو دایره­‌دن آیاغینی ائشیگه قویاسان! بیلدین؟» سونرا دئیینه- دئیینه اوتاقدان ائشیگه چیخدی. چومبلتمه دایره‌­نین ایچینده اوتوروب، سنه دوشوندوم. کئشگه ساققیزلاری­نین بیرینی ایندی چئینه­‌ییردیم. اوندا آرتیق داریخمازدیم. بیر، ایکی، اوچ، دؤرد نه بیلیم، نئچه ثانیه ساعات بلکی دیقه بئله سوووشدو. هندوریمده‌­کی دایره ائله هئیله یئرینده قالمیشدی. بختور باشینا! داریخمیردی. ائله قویسایدین همشه بئله قالاردی. من دئییلدیم کی -فیرتینا!- آنام منه دئییردی سنین آدین گره­‌ک ائلناز اولموردو، ائل فیرتیناسی اولوردو. اویان بویانا باخدیم. چانتامین آغزی آچیلمیش، هرنه‌­یی ایسه یئره توکولموشدو. آنام ساققیزلاری چانتامدان گؤتورموش، قالان وساییلیمی­ده یئره تؤکموشدو. اولان قالان پوللاریمی وئریب سنین ایکی ساققیزی-نی آلمیشدیم. آنجاق حئییف! ایندی بیری­ده اؤزومه قالمامیشدی. داریخدیم. قیچلاریمی اوزاتدیم. دایره باشیما قیشقیردی: «آی قیز! قارنیم پارتلادی. نه خبرین دی؟». سایمادیم. قیچلاریمی آرتیق اوزاتدیم: «من سنه گوره بوردا دوستاقلانمیشام. سن اولماسایدین ایندی پارکدا یولداشیملا اویناردیم» دایره دئدی: «سن ائلییه بیلرسن منیم ایچیمده اولا- اولا گئدیب، یولداشینلا اوینایاسان».
دئدیم: «نئجه ائلییه بیلرم آخی؟ بیه ائشیتمه دین آنام نه دئدی؟»
دایره دئدی: «باخ منه» و سونرا ال قولون اوزادیب یئکلدی. اللری گئدیب دایاندی اوتاغین قاپی­سینا. باشی ایسه پنجره‌یه یاپیشدی. قوللاری تاوانا دیرماشدی. اینانا بیلمیردیم دایره او قدر یئکلمیشدی­کی اوتاغیم­دا اونون ایچینده ایدی.
فیشفیشا کیمی یئریمدن آتیلدیم. بیلمیردیم اوتاقدان هارا گئدم؟ قاچیب پنجره‌­نی آچدیم. دایره‌­نین الیندن یاپیشیب ائندیم آشاغی. من آشاغی ائندیکجه دایره ده اوزاندی اوزاندی گلدی چاتدی یئره. ایندی تکجه من یوخ، ائویمیزده دایره نین ایچینده ایدی. هااااااااریکااااااا ایدی. «آرتیق آنام منه حیرصلنه بیلمز. من کی دایره‌نین ایچینده‌یم هله.» دایره‌نین اللریندن یاپیشیب، اؤزومله خیاوانا ساری یوروتدوم. اوزاقدان شاپانی گؤردوم. خییاوان قیراغیندا ساتیلمامیش ساققیزلارینی بیر بیری­نین دالینا دوزموش، اویان بویانا گئدیردی. دایره ایله گلیب چاتدیم شاپانین یانینا: «بو گون سنده‌­ن باشقا کیمسه مندن ساققیز آلمامیش».
ساققیز لارینی سایدیم اون بئش میلیون اللی ساققیزین هله ساتیلمامیشدی.
«اوه ه ه چوخ پیس»
بئله اولمازدی. هاوا دا آز قالیردی قارانلیقلاشا. گره­‌ک بیر ایش گؤروردوم. یئنه چؤمبلتمه دایره‌­نین ایچینده اوتوردوم. اون بیر دؤنه دوشوندوم. آنجاق بیر یول تاپمادیم. اون ایکینجی دؤنه دوشوننده، بیر ایشیق گؤزلریمدن گیریب قولاقلاریمدان چیخدی. آتیلیب گؤیه دئدیم : «تئز اول! گل منیم یانیما».
شاپان مات مات منه باخیب، دئدی: «من کی سنین یانیندا یام»
دئدیم: « باخ بورا دئییرم.» و سونرا الیندن یاپیشیب، شاپانی­ده گتیردیم دایره­‌نین ایچینه. سونرا آغزیمی دایره­‌نین آغزینا دایاییب، باشلادیم پیله‌­مه­‌یه. پیله هئی پیله. دایره شیشدی- شیشدی و بیر بؤیوک قویوق کیمی گؤیه قالخدی. قیشقیردیم: «اؤزوندن موغایت اول شاپان! آرتیق هر نه‌­دن قورتاردیق. من آنامین دایره‌­سیندن و سن ساتیلمامیش ساققیزلاردان».
دایره‌­نین اوزه‌­رینده اولا- اولا، قالخیب- قالخیب گؤیه چاتدیق. شهر گئت گئده بالاجالاشیردی. آداملار ائله باشلاری آشاغیدا، گل گئتده ایدیلر. کیمسه بیزی نه گؤروردو نه دویوردو. کپنکلر، دورنالار، قارانقوشلار بیزی دؤوره­‌له­‌میش، اوچوردولار. بیر ماوی قوقوش قویوغون، یانی شیشمان دایره نین اوجوندان یاپیشیب بیزی بولودلارا ساری آپاریردی. بیز ایکیمیز اله- اله وئریب، جیک جیک جوجه لریمی اوخویوب شاققیلداییردیق. شیشمان دایره گئتدی- گئتدی بولودلارا یئتیشدی. بولودلارین اوستونده بیر بوزلاق قالا گؤرونوردو. هنده­ورینی­ده قارا بولودلار توتموشدولار. شیشمان دایره قالایا یاخینلاشاندا بیر آسلانمیش بوزا ایلیشیب، قارنی پارتلاییب، ائندی- ائندی، گئتدی توشدو قالانین اوستونه. قالانین هر یانیندان بوز قندیللریی آسلانمیش ایدی. نئچه آددیم قاباغا گئدیب، اویان بویانا باخدیم. آغاجلارین هامیسی قوروموشدو. قالانین قاباغیندا­کی بوتون گوللر ده سولموشدولار. سویوقدان دیشلریم بیر بیرینه دییردی. اللریمی بیر بیرینه سورتوب دئدیم: «ائله بیل بوردا بیزدن سووای هیچ کس یوخدور. نه ائله یک ؟»
شاپان دئدی: «بلکی قالانین ایچینده آدام اولا؟ گل قیشقیراق. بلکی سسیمیزی بیری ائشیتدی»
و سونرا سسله دی: « آآآآآآآآهاااااااااای»

منده شاپانا قوشولوب قیشقیردیم. بیر آزدان گؤردوم بیر ماوی بویالی ملک قالانین قاپی­سینی آچیب، قاباغا گلدی. بیزی گؤرجه‌­یین، قیشقیرا قیشقیرا قاییدیب، یولداشلارینی چاغیردی: «گلین، گلین قالامیزا قوناق گلمیش».
دالیسیجاق­دا مین اللی یوز میلیون ماوی ملک قالانین هر یئرینده‌­ن ائشیگه چیخیب، بیزی قارشیلادیلار. اونلار اوجا سسله دئدیلر: «ملک­لر یوردونا خوش گلدینیز».
سونرا بیری­سی­‌کی چوخ پارلاق ایدی و باشیندا مین اللی یوز اولدوز پاریلداییردی بیزه یاخیلاشیب دئدی: «من بو قالانین کیرالیچه‌­سی­یم. یوز اللی میلیون ثانیه دیر بیزیم یوردوموزا کیمسه گلمه‌­میش. سیز کیمسیز؟ نئجه بورا­نی تاپیب گلدیز؟» من شاپانا باخیب دئدیم: «بومنیم یولداشیمدیر. او خییاواندا ساققیز ساتیر. آنجاق کیمسه اوندان بیر زاد آلمیر. سحردن آخشاما مجبوردو خییاوانلاری دولانا. رسیم چکه بیلمیر. کارتونا باخا بیلمیر. گیزلین پالانچ اوینایا بیلمیر. هر نه­‌دن پیس! گلینجییی یوخدور. من اونون ساققیزلاری­نین ایکی­سی­نی آلدیم. آنجاق آنام منله ساواشیب، منی بیر دایره‌­نین ایچینده دوستاقلادی. آنام دئییر ساققیز پیس شئی دیر. دیش­لرینی چورودور». شاپان دا جیبلرین-دن اون بئش میلیون اللی ساققیزی چیخاردیب، گؤرستدی: «باخین من گره‌­ک گونده بونلارین هامی­سی­نی ساتام». ساتماسام گئجه­‌لر پیتزا، چیپس، دوندورما یوخوسو گؤره­‌جه­‌یم».
کیرالیچه و اونون یانیندا اولان ملک­لر باشلارینی ایکی دؤنه ساغا و ایکی دؤنه سولا ترپه‌­دیب دئدیلر: «وای نه پیس!». سونرا ماوی ملک­لرین بیری دئدی: «سیز بورا گلنده گونشی گؤرمه‌­دیز؟» من دئدیم: «گونش ؟» سونرا اویان بویانا باخیب دئدیم: «بیه بوردا گونش یوخدور؟ بیز اولدوغوموز یئرده هر گون گونشی گؤروروک». شاپان دا اللرینی گؤرسه‌­دیب دئدی: «باخین من هر گون خیاواندا او قدر اویان بویانا گئدیرم گونش اللریمی یاندیرمیش. ندن سیزین گونشیز یوخدور؟» کیرالیچه دئدی: «بیز نئچه ایل دیر گونشه تامارزی قالمیشیق. بورادا همیشه گئجه دیر. دئولر گونشی اوغورلایاندان سونرا بورادا هرنه سولموش آغاجلار یوخلامیش و هرنه بوز باغلامیش». من دئدیم: «نیه گئدیب گونشی دئولرین الین­دن قورتارمیسیز؟» کیرالیچه بیر نئچه دؤنه قانادلارین ترپه­‌دیب دئدی: «بیز چوخدان دیر ایستیریک گونشی قایتاراق. آنجاق اونلارا گوجوموز چاتمیر. بلکی سیز بیر یول تاپدیز». من دئدیم: «قویون بیر آز دوشونوم». و سونرا اوتوروب الیمی چنه­مه دایاییب دوشوندوم. اون بیر دؤنه دوشونندن سونرا گؤیه آتیلیدیم: «تاپدیم. من تاپدیم نئجه گونشی دئولرین الیندن قورتاراق». کیرالیچه دئدی: «تئز دانیش گؤرک نه دوشونوبسن؟» دئدیم: «هامی­نی چاغیرین. بوتون ملک­لری بورایا توپلایین. کیمسه قالادا قالماسین. شاپان! سنده نمنه ساققیز وارین هامی­سی­نی توک یئره». قالانین قاباغیندا های کوی ایدی. هره بیر سؤز دئییردی. ملک­‌لرین هامی­سی گلمیشدیلر. من اوجا سسله دئدیم: «قولاق آسین! سیز گره‌­ک بو ساققیزلارین هامی­سینی چئینه‌­ییب و سونرا شیشیرده سیز. باخین من بیرین گؤتوروب شیشیردیرم. سیز ده بئله ائله‌­یین.» ملک­‌لرین هامی­سی بیر ساققیز گؤتوروب، منیم کیمین آغیزلاریندا چئینه­‌ییب، شیشیرتدیلر. بیر نئچه دیقه­‌ده اون بئش میلیون اللی شیشمان آغ ساققیز بیر یئره ییغیشدی. شیشمان ساققیزلاری بیر ایپله بیر بیرینه دویونله‌­ییب، الیمه آلیب دئدیم: «دئولرین قالاسی هاردا؟ من اورا ایستیرم گئدم». کیرالیچه بونو ائشیدیب تئز بیر مله­‌یه فرمان وئردی منی بئلینه آلیب دئولرین قالاسینا آپارا. من مله­‌یین بئلینه آتیلیب دئدیم: «هامی منیم دالیمجاق گلسین. آنجاق بئله گلین کی دئولر سیزین منله گلمه­‌یینیزی بیلمه‌­سینلر. بیر یئرده گیزله­نین نه زامان سیزی چاغیرسام اوندا سیز ده گلرسیز». بیز اوچدوق اوچدوق. بولودلاری آشدیق. داغلاردان سوووشدوق. دره‌­لردن ائندیک. گئتدیک چاتدیق دئولرین یوردونا. اورادا بیر نئچه دئو گونشین آلتیندا اوزانیب، قارینلارین قاشیییردیلار. بیزی گؤرجه‌­یین تئز قالخیب شئیپورلارینی چالدیلار. بو آندا قالانین بوتون دئولری قالادان ائشیگه تؤکولدولر. منی و الیمده­‌کی اون بئش میلیون اللی ساققیزی گؤرجه‌­یین گؤزلری چیخدی دایاندی باشلاریندا. من قیشقیردیم: «من ماوی ملک­لر یوردوندان گلمیشم. سیز اورادان گونشی اوغورلامیشسینیز آنجاق گونشین بوتون بالالاری هله اوردایدیلار. من اورا گئدیب، گونشین اون بئش میلیون اللی بالاسینی بو قویوقلارین ایچینه سالیب، سیزه پای گتیر میشم». دئولرین بیری دئدی: «هااااااااااریکااااااااااا اوندا هره میزه بیر گونش چاتاجاق». بیری­سی دئدی: «بیزیم جوجوقلاریمیز بوردا چوخ داریخیرلار. یاخشی اولدو بو گونش بالالاری ایله اوینایارلار». سئویندیکلریندن هره‌­سی بیر سؤز دئییردی. سونرا من یئره ائندیکجه آمان وئرمه‌­ییب منه ساری قاچدیلار. هر بیری­سی الین آتدی بیر شیشمان ساققیزی گؤتوره.

آنجاق شیشمان ساققیزلاری الیمدن آلاندان سونرا ساققیزلار پارتلاییب، ال آیاقلارینا یاپیشدیلار. چوخ گؤرمه‌­لی‌ایدی. ساققیزلار بیر- بیر پارتلاییب دئولرین اللرینه اوزلرینه یاپیشیردیلار. ساققیزلی دئولر بونو گؤرجه‌­یین های کوی سالیب اویان بو یانا قاچیردیلار. اونلار بو قاچا قاچدا ساققیزلی اولدوقلارینا گؤره ایلیشیب بیر بیرینه یاپیشیر دیلار و آرتیق بیر ایش گؤره بیلمیردیلر. چوخ زامان چکمدی دئولرین هامی­سی بیر بیرینه یاپیشدیلار. من بونو گؤرجه‌یین بیر فیشقیراق وئردیم. بوتون ماوی ملک­‌لر تئز گلدیلر دئولرین قالاسینا. اونلار دولاشمیش دئولری بیر تلیسه سالیب، اورادان آتدیلار آشاغییا. سونرا هامی­میز گئدیب گونشی دوستاقدان چیخاردیب، گتیردیک قویدوق گؤیون اورتاسینا و اورادان قاییتدیق قالایا. بیز قالایا چاتاندا گؤردوک هر یئر یاشیللانمیش. گوللر آچمیش و بوزلار اریمیش. من باشیمی قالخیزیب گونشه باخدیم. او دا بیزیم کیمی سئوینیردی. مین اللی یوز میلیون ماوی ملک و کیرالیچه بیزی قوجاقلاییب اؤپدولر. کیرالیچه دئدی: «سیز بیزیم ان یاخشی دوستوموزسوز. بیز سیزی هئچ زامان اونوتمایاجاغیق». و سونرا قاییدیب مین اللی یوز میلیون ماوی مله‌­یه ساری اوجا سسله دئدی: «هامی قولاق آسسین! من بو ایکی اینسان یاوروسونو بورانین ملک­لر مله‌­یی دئییرم. بوندان بئله بو ایکی دوستوموز بیزله یاشایاجاقلار». ملکلرین هامی­سی هورا چکیب دئدیلر: «یاشاسین ملکلر مله­‌یی!» شاپان سئویندیییندن اللرینی آچیب فیرلاندی. من دئدیم: «من چوخداندی ائویمیزدن چیخمیشام. یقین آنام ایندی دوشوب کوچه­لره منی آختاریر. همی ده صاباحین مشقلرینی یازمامیشام. بوردا قالا بیلمه­‌رم.» شاپان دئدی: «سن گئتسن من بوردا تک قالاجاغام!» دئدیم: «من هر زامان ایسته­سم بورا گله بیلرم. تکجه گره‌­ک بیر ایش گؤره‌­م آنام حیرصلنه. اوندا دیرکی منی بیر یئرده اوتوردوب هندوریمه دایره چکجک و سونرا……….» شاپانا گؤز ووروب دئدیم: «اؤزون کی بیلیرسن نه دئییرم؟ ایندی ده تئز ائوه قاییتمالی یام.» کیرالیچه دئدی: «سنده بورادا بیزله قالسایدین یاخشی اولاردی. آمما ایندی­کی ایستیرسن قاییداسان نئیلک». و سونرا بیر مله‌­یی چاغیریب دئدی: «بو دوستوموزو ائولرینه قایتار». من مله­یین بئلینه مینیب اورادان اوزاقلاشدیم. ائندیم -ائندیم گلدیم توشدوم حیطیمیزه. سونرا یاواش- یاواش، گلدیم -گئتدیم اوتاغا و بیر دایره چکیب ایچینده اوتوردوم.

 

بیر باخیش یاز

ایمئیل یایینلانمایاجاق لازم اولان خاللانمیشدیر *