سه شنبه, فروردین ۲۸, ۱۴۰۳
اؤیکوامضا درگیسی

باش – سعید فیوضات

باش – سعید فیوضات

«آتا بابا سؤزو وار دئییر: باش منیم، باش اونون»

آلا قاپی‌دا ایلدیریم شاخدی. خالام اوغلو ایله دؤنوب آلا قاپی‌یا ساری باخدیق. قارا بیر بولود ایمکله‌یه_ایمکله‌یه گئدیردی میدانین اوستونه. شارلاری بوراخیب، دوروب موللا هادی‌دان قاچدیق آلاقاپییا ساری. دلی عزه قاپی‌لاریندا دوروب، آغیزیلا بارماقلارینی ساییردی. قول باغلاری بیلنگیندن ائنمیشدی دیرسه‌یینه. گؤزلری گؤزلریمه ساتاشینجاق بارماغی آغزیندا قالدی. قاباغیندان سوزولدوک.یئیین‌ـ یئیین آددیم آتیب، یئتیشدیک آلا قاپی مچیدینین ایوانی‌نین قاباغینا. کؤزه، مچیدین پیلله‌کانیندا دوروب الینده‌کی بؤیده‌نی قالخیزیب، رجز دئییردی. هله عاشورا اولمامیشدی. قارا بولود میدانین گؤیونده اؤزونه یئر ائله‌میشدی. میدانین اورتاسینداکی بلواردا، اوچ شامالی حوضون قیراغیندا بیر کؤتوک قویموشدولار. اونون اوستونه بیر بالتا سانجیلیب قئیقاجی قالمیشدی. بیردن دلی بایراملا، دلی سعدالله گلیب، کؤتوگه یاناکی دوردولار.
دلی بایرام ال آتیب بالتانین ساپیندان یاپیشیب باشلادی گوجَنمه‌یه.آخیردا ساغا، سولا قاهاریب، اونو کؤتوکدن قوپارتدی. دلی سعدالله دیزلرینی یئره دیره‌ییب باشینی قویدو کؤتوگون اوستونه. دلی بایرام بالتانی باشینا قالخیزیب، سالدی دلی سعدالله‌ین بوینونا.
باش،کوپ پیچه‌تی کیمین گؤده‌سیندن آیریلیب دوشدو کؤتوگون ساغ کؤندونه. یاخینا گئتدیک. وئ، نه‌خه‌دیم باش توپالاشمیشدی کؤتوگون یان یؤره‌سینه. دلی عزه یاواش یاواش گلیب باشلارین یانیندا دوروب، بارماقلاری ایلا سایماغا باشلادی. شیخین قاپیسی قاباغیندا بیر بوغو بورما کیشی دورموشدو. بوزمه‌سی اینینده، چکمه‌لری دیزه کیمین، امیری بؤرکو ده باشیندا. یاخینا گلیب، بیر باشی گؤتوردو. ایکی بارماغینی سوخدو باشین گؤزلرینه، باش بارماغینی دا سوخدو باشین آغیزینا. اوندان بیر آز آرخایا اوزادیب، سونرا لوپورت داشی کیمی یئردن بئله آتدی شیخین قاپیسینا ساری. باش یئره دَ‌ییب، قالخیب، دوشوب، فیرلانا_فیرلانا گؤتورولدو. سوزولَن قان گؤیه سپه‌له‌نیب، هردن گیرده، هردن بیضی بیر ناخیشی یارادیردی. ههه مدرسه‌ده تزه اؤیرشدیییمیز هندسه درسینده کیلر کیمی. شیخین قاپیسی اؤزو_اؤزونه آچیلیب، او باش حَیَطه کئچینجک باغلاندی. گینه ده او بوغوبورما کیشی آیری باشلاری ائله او تَهَر تولازلادی. خالام اوغلو منی دومسوکله‌ییب دئدی:
ـ بیزده گئدک؟
دؤنوب اوزونه باخدیم. گؤزـ‌گؤزه اولدوق. ائله‌بیل اودا منیم کیمین شارلاریمیزی یادیرغامیشدی. داها هئچ نه دانشیماییب گئتدیک کؤتوگون یانینا. کؤتوگ بیزه بؤیوک ایدی. خالام اوغلو بئلینی اَییب بوینونو قویدو کؤتوگه. بالتانی گوجه‌نه‌ـ‌گوجه‌نه قالخیزیب چیرپدیم اونون بوینونا. باشی آتلانیب دوشدو او بوغوبورما کیشی‌نین بؤیرونه. او دا ساغ الینی اوزادیب ایکی بارماغینی باشین گؤزونه، باش بارماغینی دا ساغ قولاغینا سوخدو. باش بالاجا ایدی. او کیشی‌نین الینده خیرچا کیمی گؤرونوردو. خالام اوغلو آیاغا دوروب منه دئدی:
ـ ایندی سیره سنده.
بوینومو اوزادیب، چنه‌می قویدوم کؤتوگون اوستونه. قان قاریشیغی یاییلدی چنه‌مه، اییسی دولدو بورنوما. خالام اوغلو بالتانی قالخیزیب ائندیرنده بیری اونو چاغیردی.
اونون دا قوْلو هئی‌دن دوشدو. بالتا اؤز آغیرلیغی ایلا دوشوب، بوینومو یاریب، اورتادا قالدی. دئدیم: من یاریمچیلیق قالدیم. آما خالام اوغلو قولاق آردینا ووروب یولونو چکیب گئتدی.
بوینومدا ایلیشن بالتا ایلا دوروب، آشاـ‌آشا کابابچی قوربانین توکانینا ساری گئتدیم. قَنووون اوستوندن آتلاناندا بالتانین ساپی سویود آغاجینا دَیدی. باشیم بوینومدان قوپوب، یئره دوشوب، دیبیرلاندی. بوغو بورما کیشی گلیب سول الیله باشمی گؤتوروب ایکی بارماغینی گؤزومه، باش بارماغینی دا سول قولاغیما سوخوب گئتدی، شیخا ساری. قاپی آچیلمادی، او دا کئچدی اکبری کیتابچیسینا. اکبری باخاـ‌باخا قالمیشدی. بوغو بورما کیشی گئدیب توکانین دال پنجره‌سینی آچیب باشی آتدی شیخین حیطینه. پرچیم دوشدوم. یولا دوشوب ائوه ساری گئتدیم. قاپیمیز دیریق قالمیشدی. ایچَری کئچیب، گؤردوم آنام پالتار یویور. آنام منی گؤرونجک، ساغ الینی سول الینه چیرپیب، دئدی:
ـ آی بالا، باشون هانی؟
آتامین سسی ائودن گلدی، دئدی:
ـ عیبی یوخ. یئرینه بیری چیخار.
کئچدیم ائوه. آتام صندلیده اوتوروب قیچلارینی بیرـ‌بیرینین اوستونه آشیریب روزنامه اوخویوردو. بیردن روزنامه‌نی سالدی آشاغی. آتامین باشی یوخ ایدی.
سون

بیر باخیش یاز

ایمئیل یایینلانمایاجاق لازم اولان خاللانمیشدیر *