پنجشنبه, اسفند ۱۰, ۱۴۰۲
اؤیکوامضا درگیسی

اؤزگه – حسن ثمودی قلعه‌لر

اؤزگه – حسن ثمودی قلعه‌لر

شام

اؤزوم پیشیرمیشم. کریمین آز قالیر اوشاغی اولا؛ قارنی چوخ گلیب قاباغا. اتی سودا پیشیرمیشم. «چوروک» آرواد بیلمیرکی یاغ یانی نمنه؟! فقط باشاریر چؤپ اوزالدا. تاوانی سوفرانین وسطینه قویورام. اوتورورام کریمین یانیندا، دیزیم- دیزینه ده‌ییر. کریم قاشلارین آتیر اوسته کی یانی ایندی یوخ… بیلیرم گئجه دانلایاجاق: سنه مین دفه دئمه‌میشم «پری»‌­نین یانیندا فیلیم وئرمه!؟هن!؟… منده دئیه‌جم اؤتور قوجا آروادی، گل قوجاغیما… هر شئی یادیندان چیخاجاق… چوروک گلدی سوفرا باشینا، الینده چؤرک… هئچ واقت قویماز چؤره‌یی من گتیرم. نئینیرم بودوبا قیچیمی کریمین قیچینا سورتورم فقط حیرسی چیخسین. قویون کیمی باشین سالیب آشاغی‌یا یانی گؤرمورم. منده بیلیرم آروادلار بو ایشلردن گئچمزلر… نه یاپیشیر آللاه! …

– آرواد هانی دوز؟

کریم گئنه سسین آتدی باشینا، منه دورتمه ویریر گئدم دوز­قابی گتیرم آمما چوروک مندن تئز دورور.

-بو نه سوفراسیدی؟ نه دوز وار، نه سو وار، نه آلدیغیم گؤی وار! …

– اونو صابا آش ائلییه‌جه‌یم.

– سس سالما آرواد، اودا توخودوغوز فرش‌دی… گونده ایکی لای­دا توخوموسوز! …

نفسیمی وئریرم ائشییه. ایندی ایشیم یوخدو قوی گئجه اولسون! قوی چیراغلاری ویراق! چوروک دوزقابی گتیریر، بیلمیرم کریم بونو نیه آلیب، شاید او زامان کندلرینده بیر صاف – سوللو قیز یوخوموش. چرقدینن اوتوروب سوفرا باشیندا، ائله بیل بوردا اؤزگه وار. کریم دئییر: «ات نیه بوجور اولوب؟»

پری ایسته‌ییر جواب وئرسین دئییرم: «اؤزوم یاغ سیز پیشیرمیشم… باخ قارنیوا! …»

الینده بیر تیکه چؤرک وار. قارنینا باخیر، پری­یه باخیر، تیکه‌نی قویور آغزینا. پری­دن سوروشور: «ناصر» گله‌جک دالینجان یا «نادر؟»

آللاه چوخ شوکور بیر آی گئدیر کندلرینه، کریمینن راحات اولاجاغام.

چوروک دئییر: «ناصر گله‌جک.»

کئفیم سازدی. بیر آی بو ائوین تکجه آروادی اولاجاغام. اوووووف… کریمینن تکجه‌… به‌ به‌ … دایی قیزیمدان بیر سی­دی آلمیشام کریمی قوزایاجاغام دوراق ایکی میز اوینایاق، دورماسادا زورونان قوزایاجاغام… بو آی پاتلاداجاغام… ائی وای نه واقت صاباح اولاجاق!؟

سوفرانی ییغیشدیریرام. یئرده – گؤیده دورمورام. کریم دئییر: «آی بالا باخ گؤر گرمکن یانیر من باشیمی بیر توتام سو آلتینا؟»

چوروک گئدیر حاماما سویو آچیر… هاوالار چوخ سویویوب… گلیر دئییر:«هن، سو ایندی ایستیدی…»

حامام

یا آللاه دئییب دورورام. قیرمیز حولونو گؤتوروب گئدیرم، پری آلت پالتارلاریمی گتیرر. دامپایا گئییرم چیخیرام حیطه. واخ واخ هاوا نه سویویوب آی بالا… قاپینی آچیرام گیریرم حاماما. هئچ یئری گؤرمورم… آت پالتارلاریمی چیخاردیرام، اول باشیمی سونرا ساغ طرفیمی سونرا سول طرفیمی توتورام سویا. هئچ بیلمه‌دیم نیت ائله‌دیم یا یوخ… صابا پری گئدیر… هوشوم باشیمدا ده‌ییر. نه واقت یانیمدان گئدر، داشقانین چولایا توشمه‌سی یادیما توشر… باشیندا چؤرک وار ایدی… نه قدر گوج وئریردیم داشقا چولادان چیخمیردی… دئدی: «عمواوغلو چیخمیر؟!» دئدیم: «یوخ…» گئنه گوج وئردیم… دئدی: «بلکه آجیبسان!؟هن!؟ …» بیر تیکه چؤرک کسدی وئردی… گولدوم دئدیم: «یوخ، آج ده‌ییرم…».دئدی: «آل!»

اوتانیردیم، چؤره‌یی آلدیم یئدیم، داشقایا ال آتدیم چیخدی گلدی… پری گوله ­_گوله گئتدی… من بیلمه‌دیم نه اولدو. دؤنموشدوم دالدان باخیردیم بیله‌سینه. گئتدیم ننه‌مه دئدیم: «پری­نی ایسته‌ییرم.»

پری گیردی ایچری‌یه. همه‌شه گلیب کوره‌ییمی سورتر. ایندی اوتانیرام یانیندا لوت اولام. دئییرم به خیانت ائله‌میشم. گئنه بوبیری کؤپه‌یین قیزیندان اوشاق اولسایدی اوره‌ییم ساکیت‌لشردی. من نئینیم آخی دؤهتور اؤزو دئدی: بوندان اوشاغین اولماز! … پری دئییر: «کریم! نه‌یه فیکیرلشیسن؟»

کوره‌ییمی سورتور. دئییرم: «هئچ… گئدیسن ناراحاتام.» دئییر: «گئدیرم گلم، قالمایاجاغام کی کتده. سیزده بیزآز راحات اولارسیز…»

چؤنورم باخیرام گؤزلرینه، الینده لیف کفله‌نیب. چیرمالانیب. نازیک اللری – قیچلاری گؤرسه‌نیر… دئییرم: «بیز راحاتیق…»

بیله‌ییمدن یاپشیر ایسته‌ییر منی چئویره… چؤنمورم. الین اوستومدن گؤتورمور، آمما فیشاردا وئرمیر. دئییرم: «سن گئتسن من هئچ ایش گؤرنمه‌رم. نه چؤره‌یین وار نه اؤزون.»

باخیر اوزومه دئییر: «نمنه دئییسن؟»

دئییرم: «ایسته‌ییرم صاباحدان اوروج توتام، یای‌دا بیر گونده توتمامیشام.»

– رحیمه سنی اؤلدورر…

– پوخ یئیر… اوچ ایلدی گلیب هئرساد یوخدو… بیر اوشاقدا چیخاردانمادیق.

– یاخجی دؤن.

کوره‌ییمی وئریرم اونا ساری. سورتور. تازا آت پالتارلاریمی ویریب آسقی‌یا. ایسته‌ییر حامامدان چیخا، دئییرم: «پری؟»

چؤنوب اوزومه باخیر.

– هاوا سویوقدو، چرقدیوی وئر گئجه باغلاییم باشیما.

باشیندان آچیر وئریر. بیلمیرم نمنه دئیم، حامامدان چیخیر. چوخداندیر اؤزومو ایتیرمیشم.

آشپزخانانین پنجره‌سی

اللریمی سینکده صابینلاییرام. آینایا باخیرام، باشیم آغاریب… نامازیم قالیر، گؤره‌سن «رحیمه» کریمه نه دئیه‌جک، دستاماز آلیرام، بیردن دیسکینیرم، دئییرم به کریم دالدان گلیب منی قوجاقلایا. آمما یوخدو. باشیمدا چرقد اولسا بو فیکیرلر باشیما گلمز. دای او گونلر سوووشوب، چوخداندیر کریم دالیمجان گلمیر. آشپزخانانین پنجره‌سیندن باخیب گؤرردیم گلیر، قاچیب قاپینین دالیسیندا گیزله‌نردیم، قاپینی آچاندا دالدان آتیلاردیم اوستونه. بوینون قوجاقلاردیم. ایندی داهی آشپزخانانین پنجره‌سی «سئلاب»آ باخیر. اوچ ایلدی گلمیشیک تبریزه. نمنه ائو وار بوردان گؤرسه‌نیر. قوی گؤروم قیزلار بویون نه ایش گؤرورلر… ایکی قیز تاپمیشام، اوتاغین وسطینده اوینایاردیلار، بویون یوخدولار، چیراقلاریدا یانمیر. آشپزخانادا یاتیرام. کریم بورا برقی بخاری قوروب. آیری اوتاق یوخدو. بؤیوک اوتاقدا اونلار ایکیسی یاتار. کریم اون بیر خبرینه باخار سونرا چیراقلاری گئچیردر. ایسته‌مه‌رم اوندان سونرایا فیکیرله‌شم. فیکریمی آپاررام کنده. گئنه عمه اولموشام. صابا گئده‌جه‌یم قارداش اوغلومون یانینا. «کلثوم» پیس مریضله‌ییب، گرک یانیندا قالام. کریم کتده اوروج توتاردی؛ یایی‌دا- قیشی‌دا. گلدی تبریزه، الینه شیلانکی آلدی چمن سولادی. اوروج توتمادی. ائوه گیرنده ائله‌بیل اؤزگه گیریر. نه سلام نه صاباح، فقط بیر قوری چای. رحیمه‌نین یانیندا. داهی اوزونه باخیب گولنمیرم. رحیمه‌ده منه گؤره اؤزو اولانمیر. بیلیرم! آرواد بوجور اولماز کی! بیر- بیریمیزه اؤزگه اولموشوق.

بؤیوک ننه‌م دئیردی: «دده‌ن یئره بوغدا اکنده، بیر گون سونرا گئت زمی‌نین قیراغیندا سنده الینده بیرآز اک. بوغدانی گؤتورنده، گئت بوغداوی قات دده‌وین بوغداسینا، هر چؤرک یاپاندا اوندان بیرآز ایشلت.» کریمه هئچ واقت دئمه‌میشم، کیشی‌لر بیلمزلر، بیلسه‌لرده گلیب، مسخره ائلرلر. باشیمدا چرقد یوخدو جانیم قیزیشیر. کریم بو اوچ ایلده چرقدیمی آلمامیشدی. کتده نه واقت حامامدان چیخاردی باشینا باغلاردیم. شاید داهی ایسته‌میر اوشاغا فیکیرلشه. بیلمیرم!

کتده بیلمه‌زیدیم نجور گرک بیر کیشینی اؤپم. گئجه یاتاندا الیمی اؤپردیم. اوره‌ییم کریمی ایسته‌ییر. آز قالیرام کریمی چاغیرام. آمما اولماز. بیلیرم، باشیما چرقد باغلاسام هاوادان توشه‌رم. آیری چرقد آختاریرام. بوخجالارین بیرینین پالتارلارین تؤکوب یئره، چرقد تاپیب، باشیما باغلاییرام. رحیمه‌نین سسی گلیر، سانکی آغلاییر، یامان- یوووز دئییر. آشپزخانانین قاپیسی آچیلیر. رحیمه جومور منیم اوستومه، کریم دالدان گلیر…

– من سنی گرک بوغام کؤپه‌یین قیزی… سن کریمه دئییبسن اوروج توت!؟هن!؟

 

بیر باخیش یاز

ایمئیل یایینلانمایاجاق لازم اولان خاللانمیشدیر *