قیش یوخوسو
قیش یوخوسو
رضا کاظمی
چوخدان بَری بیر ـ بیریمیزله آتیشمامیشدیق. قیشدان بو یانا. نه اونلارین بیزله ایشی وار ایدی، نه بیزیم اونلارلا. کئشیک‌چی سسینی باشینا آتیب بیزی چاغیراندا، دئدیک هلبت یئنه قودوروب-لار. توفنگ‌لریمیزی گؤتوروب پیلله‌لری ایکی اوچ چیخدیق. گئده باجادان گؤز گؤتورموردو. اونو قیراغا ایته‌له‌ییب بیر بیر دَلیکدن باخدیق. ایکی اولدوزلو سیقار آلیشدیردی. کئشیک‌چی دوز دئییردی. اونلار یاواش ـ یاواش اوزه چیخیردیلار.
بی‌سیم‌چی خیشیلتی سالیب مرکزه خبر وئردی. دئدیلر هله‌لیک دؤرد گؤز کئشیک دایانین. چوخدان ایدی اونلارا دئمه‌یه سؤزوموز اولموردو. نهایت هاوایا گؤره دانیشیردیق، یئییب ایچمه-ییمیزه گؤره، کیمین مریض اولوب اولمامادیغینا گؤره. بو دؤنه آنجاق اَمللی‌باشلی بیر راپورت وئره بیلمیشدیک.
اَیله‌شیب، گؤردویوموز شئیه گؤره دانیشماغا باشلادیق. ایکی اولدوزلو دا بیزیم کیمی سرباز ایدی. سون آتیشمادان بو یانا هامینی بوردان گؤتوروب آیری یئره وئردیلر. بیز قالدیق، بیر ده یئره اوتوران خئیلک قار. او بیری‌لری هلکوپترله گلیب آپاردیلار. بیزه دئدیلر دوشمن بیر داها بو پوخ‌لاردان یئمز، آمما سیز آییق اولمالی‌سیز.
سون آی‌لار موفته‌سینه یئییب یاتمیشدیق. قاردان بو یانا هئچ بیریمیز بوردان ائشییه چیخمامیشدی. یئییب ایچمه‌ییمیزی آیدا بیر یول گتیریب، باشیمیزین اوستوندن پادگانین ایچینه تولازلاییردیلار. ایچَریده نفتیمیز وار ایدی. یایدا یئرین آلتینداکی سیغیناجاغین یاریسینی نفت پیتیق‌لاری‌یلا دولدورموشدوق. ایکی اولدوزلو دئییردی: بورا بمب آتسالار بئله، بونلارا بیر زاد اولماز. آنجاق بمب سهل‌دی، او تایداکی‌لار گوللـه آتماغی دا اونوتموشدولار.
ائشیتدیییمزه گؤره او بیری جبهه‌لرده آردی کَسیلمه‌دن آتیشیردیلار. آمما بوردا سویوق هر نه‌یی دوندوردوغو کیمی دؤیوشو ده دوندورموشدو. بیز پیله‌ته‌نین آخیر خودوندا پتولاری چیینیمیزه آتیب کئشیک چکیردیک. هر دن باجادان او تایا باخیردیق. قارشی داغین باشیندا اونلار دا آیی کیمی پادیگان‌لارینا گیرمیشدیلر.
کئشیک‌چی قار ایچیندن باش قالدیرمیش دمیر بیر بؤرک گؤرموشدو. چو دوشموشدو: یوروشدن سونرا اونلارین باش کوماندانینا دیوان توتوب‌لار. دیوان دا دئیَنده، پریزیدئنت‌لری بؤیوک بیر قوناقلیقدا اونون اوچ قوبباسینی قوپاردیب آغزیندان گلنی دئییب. سونرا اونو او بیری‌لرین گؤزونون قاباغیندا آسیب‌لار. سونرا اَیله‌شیب شام یئییب‌لر.
بو جور سؤزلر تئز یاییلیر. آدام‌لار گئت‌گل ائله‌یه‌نمه‌سه ده شایعه‌لر بورا گلیب گئدیردیلر. بیز ده پتولارا بوروندویوموز حالدا اَلیمیزی پیله‌ته‌نین اوستونه توتا توتا اونلارا قولاق آسیردیق. قیش گئجه-لری، اؤزو ده ائله بیر یئرده چوخ اوزون اولور. هر گئجه بیر سؤز چیخیردی. بیری دئییردی بیر قوشون یاتیب قارین آلتیندا. بیری دئییردی چوخونون دا اولدوزو وار. بیری دئییردی جیب‌لری دولودور خاریجی پولدان زاددان. بیز ساعات‌لارجا تک باشینا کئشیک وئره‌رک ائشیتدیک‌لریمیزه دوشونوردوک. دَلیکدنر نه‌یی اؤرت‌باسدیر ائله‌میش قارلارا باخیردیق.
یاز یئلی اَسدیکجه، یئرده‌کی قار اَریمه‌یه باشلادی. اونلار بیرـ بیر قار آلتیندان چیخیردیلار. بیر قوشون اولماسایدیلار دا آنجاق چوخ چوخ ایدیلار. آسیلماق شایعه‌سی دوز اولسا، آسیلماق اوچ قوببالی‌نین حاقی ایدی. ایکی داغین آراسی دولویدو اونلارین جنازه‌لریندن. بیز بو ایشی اوچ مسلسل ایله باجارا بیلدیک. چوخ دا چتین دئییلدی. اَلیمیزی ماشادان گؤتورمه‌دن، کیمسه‌لری شیلنگ ایله سولایان کیمی اونوآشاغیداکی سربازلارا ساری توتوردوق. اونلار دَلیک‌دئشیک اولوردو.
گئجه صوبحه کیمی قار یاغدی. اونلاردان یارالیسی دا آز دئییلدی. توپ گوللـه آراسیندا سَس‌لرینی ائشیدیردیک. حتا آشاغی گئدیب جانلی‌ـ باشلی‌لارینی اَسیر گتیرمک فیکرینه دوشدوک، آنجاق او تایدان دالبادال منور آتیب هر نه‌یی گؤز آلتینا آلمیشدیلار. بیرینی دیری توتسایدیق، اونلارا باها باشا گله‌جه‌یینی بیلیردیلر. ایلک آددیمدا باش‌لاری داشا دَیمیشدی. نه اوچون کاریخدیق‌لاریندان هله ده باش آچمامیشیق. هر حالدا، داها هئچ بیری داششاق ائله‌ییب یوواسیندان چؤله چیخمادی. هاوا ایشیقلاناناجاق، بیر یاندان قار یاغدی، بیر یاندان قورشون. صوبح، دره آغ‌آپباق ایدی. هر نه قار آلتیندا قالمیشدی.
بئلیمیزه‌جک یئره قار اوتورموشدو. یارالی‌لارین اینیلتی‌سی بیردن بیره باتدی. آنجاق هر دن کئشیک وئردیییمیزده قار آلتیندان نسه بیر سس ائشیدیردیک. بعضی‌لری دئییردی بیزی قارا باسیر، بعضی‌لری دئییردی بو سس سویوقدان دونموش یارالی‌لارین قارغیشدی. گئجه‌لر یاتاقخانادا ساعات‌لارجا بئله شئی‌لرین اوستونده دارتیشیردیق. قارغیش اولسایدی دا اؤز یوخاری باش-لارینا قاییداجاق ایدی. بیز اونلاری قوناق چاغیرمامیشدیق کی.
آرامیزدا هر ندن چوخ دوربین اَلدن اَله گزیردی. بیز قار آلتیندان چیخان قول‌قیچ‌لارا باخیردیق. پوتون‌لاری دونیانین او باشیندان گلیردی. نَم‌کیم بو سؤزو آتدی اورتایا. سونرا توفنگ‌لریندن دانیشدیق، قول‌لارینداکی ساعات‌لاردان. پالتارلاری داها ایشیمیزه یارامازدی. دَمیر بؤرک‌لری ده پیس دئییلدی. بیریمیز دئدی یوخ. دئدی اونلار دا صوبحدن آخشاما بیزیم کیمی دره‌یه گؤز تیکیبلر. دئدی ممکن اولسایدی، اؤزلری چیخیب اؤلولرینی یئردن گؤتورَردیلر. ایکی اولدوزلو سیقار آلیشدیریب، توستوسونو باشی‌نین اوستونه پیله‌دی. دئدی: توفنگ‌لرینی اَلیمیزه کئچیرمه‌لی‌ییک. آمما ایندی یوخ، گئجه یاریسی. اؤزو ده آی گؤیده اولمایاندا.
گئجه‌لر آیین آریقلاماسینی گوددوک. آی آریقلاییب آریقلاییب یوخ اولدو. سونرا اوچ نفره یولا دوشدوک. گئجه یاری‌نی کئچسه‌یدی ده هئچ‌کس یاتا بیلمه‌میشدی. قار دیزیمیزدن آشاغی‌یا دوشموشدو. آیاغیمیزین آلتی خیرچیلدایا خیرچیلدایا، دره‌نین دیبینه یاخینلاشدیق. اونلارا آز قالان، باشیمیزین اوستونه منور آتدیلار. اوچوموز ده یئره سَریلیب اورداکی‌لار کیمی دونوب قالدیق. یئره نفس گلمیشدی، قار یاشالمیشدی. یئرده‌کی‌لرین دویو داها آچیلمیشدی. منور یاواش یاواش آشاغی گلدیکده اونلارین اوزونه باخدیق. یاز یئلی یوخولارینی پوزموشدو. بعضی‌سی گئت گئده چورومه‌یه باشلاییردی. منور دره‌نین اورتاسینا دوشوب سؤندو. بیز آیاغا دوروبایکی‌قات قاباغا گئتدیک. اؤلدوک‌لرینی بیلیردیک، آمما یئنه توفنگ‌لریمیزی اونلارا ساری توتموشدوق. ایلک اؤنجه سیلاح‌لارینی ییغاجاق ایدیک. الیمیزده‌کی توربانین آغزینی آچیب، بیر بیر یوزی‌لرینی گؤتورمه‌یه باشلادیق. یئنه منور آتدیلار. بیز اونلارین بؤیرونده اوزو قویلو اوزانیب، گوددوک. قارشی داغدان اوستوموزه گوللـه یاغدیردیلار. مثل اینکه شست‌شان خبردار شده بود. بیزیمکی‌لر ده اونلارین جاوابیندا آتشه باشلادیلار. نئچه آیدان سونرا، دره‌نین ایچی، توپ گوللـه سسی‌یله دولوردو. بیزیمکی‌لر خومپارا دا آتیردیلار. داها اوردا قالانمازدیق. آیاغا دوروب بیر زاد گؤتورمه‌دن تَلسه تَلسه دالی قاییتدیق. بیریمیز دایانیب آخ دئدی. سونرا آیاغینی چکه چکه گلدی. دئدی: قیچیما گوللـه دَیدی. اونلار گئجه‌نین قارانلیغیندا هر دن آیاغیمیزین آلتیندا قالیردیلار.دره‌نین دیبیندن بیر آز اوزاقلاشدیغیمیزدا یئنه یاخینلیغیمیزا منور آتدیلار. یئنه یئره اوزانیب ایشیق اونلارین آچیق گؤزلرینده سؤنونجک، یئریمیزدن دورمادیق. چتین‌لیک‌له اؤز داغیمیزین آرخاسینا کئچیب گوللـه‌لردن ایراق قالاراق، گلدیییمیز یولدان اوسته چیخدیق. اوچونجوموز آخسایا آخسایا دالیمیزجاق گلدی.
او گئجه صوبحه‌جک آتیشدیق. گون چیخاندا، ایکی اولدوزلو بیزی ایکی یئره بؤلدو. یاریمیز قارشی داغا گوللـه آتیردی، یاریمیز دا اونلارین اَلی‌نین آلتیندا ایشله‌ییردی. مرکزه ده بی‌سیم ووردوق. دئدیک: ائله‌بیل ایلانین کئیی آچیلیب. دئدیلر بیر آز دؤزون، ایلان‌توتان گؤنده‌ره‌ریک. نئچه گوندن سونرا هلکوپتر ایلان‌توتان‌لاری گتیردی. یارالی سربازیمیزی دا همن هلکوپترله دالا یوللادیق. پادیگانیمیز یئنه تزه سربازلا دولموشدو.